Kuri uyu wa gatatu, tariki ya 15/10/2025, ku nshuro ya 28 mu Rwanda hizihijwe umunsi mpuzamahanga w’umugore wo mu cyaro. Ni umunsi bahaye insanganyamatsiko igira iti: “UMUGORE NI UW’AGACIRO”, ku rwego rw’Akarere ka Musanze wizihirijwe mu murenge wa Muko.
Umunyamabanga Nshingwabikorwa w’Umurenge wa Muko, Bwana BISENGIMANA Janvier yatangiye aha ikaze abitabiriye ibirori kandi atanga n’ishusho y’umurenge. Yavuze ko Umurenge wa Muko ari umwe mu mirenge igize Akarere ka Musanze, ufite Utugari4; Imidugudu30; Amasibo 253, ukaba utuwe n’abagabo ibihumbi 12496, bangana na 47,2%; Abagore ibihumbi 13,976 bangana na 52%.
Nk’uko byatangajwe n’Umunyamabanga Nshingwabikorwa w’Umurenge wa Muko, yagize ati: “Umurenge wa Muko ufatwa nk’ikigega cy’Akarere ka Musanze kuko 80% by’ibiribwa bitunze ababa mu mugi wa Musanze biva mu murenge wa Muko kuko ahanini abawutuye bakora umwuga w’ubuhinzi; Muri uyu murenge kandi hari amakoperative arenga 55, yibumbiyemo abanyamurango basaga ibihumbi 3,000. Aya makoperative akaba afasha abaturage kwiteza imbere”.
Ibi birori byitabiriwe n’abanyacyubahiro batandukanye, umushitsi mukuru akaba yari Umuyobozi w’Akarere ka Musanze. Byarimo umuyobozi w’Inama y’igihugu y’abagore, waturutse ku rwego rw’igihugu; Umuyobozi w’Inama Njyanama y’Akarere ka Musanze; Ukuriye Ingabo mu karere ka Musanze; Gakenke na Burera; Umuyobozi wa Polisi y’u Rwanda mu karere ka Musanze; Abagize Njyanama y’Akarere ka Musanze ndetse n’iy’Umurenge wa Muko; Abafatanyabikorwa b’Umurenge wa Muko n’abaturage bo muri uwo murenge ariko abenshi bakaba bari ab’igitsina gore k’uburyo byagaragaraga ko ari umunsi w’umugore koko.
Ni umuhango wagaragayemo ubuhamya bw’umuryango wabanaga mu makimbirane ariko ubu ukaba ubanye neza, ni umuryango wa NTIBANYENDERA Pierre Celestin na NIKUZE Alphonsine, batuye mu mudugudu wa Bugese; Akagari ka Mburabuturo mu murenge wa Muko. Uyu mugabo yari yarabaswe n’ingeso y’ubusinzi n’izindi ubuyobozi buramwegera bumuha inama, kuri ubu biteje imbere kandi ni n’urugero ku yindi miryango.
Byagaragaye ko iterambere rishoboka iyo umugore n’umugabo babanye neza, bitanga ubutumwa ku rundi ruhande ko abantu bagomba kwirinda ubusinzi kandi bagaha agaciro abo bashakanye; Abashakanye bakitabira kubana mu buryo bwemewe n’amategeko “Gusezerana”; Kwita ku muryango, abana bakagira imirire myiza; Bakita ku isuku mu ngo zabo, kwitabira umurimo bikagirwa intego nyamukuru.
Muri uyu muhango wo kwizihiza umunsi mpuzamahanga w’umugore wo mu cyaro, hatanzwe ubutumwa butandukanye ku bitabiriye ibirori. Basobanuriwe imvo n’imvano y’uyu munsi, ni umunsi wemerejwe mu nama mpuzamahanga yabereye i Beijing mu Bushinwa mu mwaka w’1995. Mu Rwanda naho wizihijwe ku nshuro ya 28, wahawe kandi insanganyamatsiko igira iti: “UMUGORE NI UW’AGACIRO”.
Umuyobozi w’inama y’igihugu y’abagore Madamu NYIRAJYAMBERE Belancille, yabwiye abitabiriye ibiroro ko abagore ari ba mutima w’urugo mu muryango kandi ko ari Nyina w’umuntu. Umugore akaba isoko y’iterambere ry’umuryango n’igihugu muri rusange kandi ko baciye umugani ko ukurusha umugore akurusha urugo, yibukije abaraho insanganyamatsiko y’umunsi mpuzamahanga w’umugore wo mu cyaro ko Umugore ari uw’agaciro.
Yasabye abagore ko bagomba gufata abana babo neza, babarinda igwingira ko kandi nta terambere ryagerwaho umugabo atabigizemo uruhare. Aho yagize ati: “Umugore ni uw’agaciro, byose tubikesha ubuyobozi bwiza bw’igihugu cyacu burangajwe imbere na Nyakubahwa Perezida wa Repubulika y’u Rwanda Paul Kagame, ubuyobozibwashizeho ingamba zo kongerera umugore ubushobozi mu nzego zose, mu bukungu; Mu miyoborere myiza; Mu mibereho myiza n’Ubutabera, ibi bikaba byaratubereye inzira y’iterambere”.
Yakomeje agira ati: “Twubakire ku byagezweho tubisigasire, dukore byinshi kandi byiza. Turi mu kwezi k’Ubumwe; Ubwiyunge n’Ubudaheranwa, turusheho kuzirikana ko bitangirira mu miryango yacu, bityo aho twavuye n’igihugu haduhe amasomo yo kubaka uyu munsi n’ejo hazaza. Abashimiwe ibikorwa by’indashikirwa bakomeze babe urumuri kugirango bitere ishyaka abakibitekerezaho, nabo tuzabashimire ubuzakurikiraho”.
Uyu muyobozi yasoje ashimira abafatanyabikorwa, bafashije gutegura iki gikorwa n’ibindi byose bifasha umugore wo mu cyaro kwiteza imbere; Aho yagize ati: “Dukomeze kubaba hafi kugira ngo bakomeze kuba umusemburo w’iterambere ry’igihugu kandi muri iyi minsi 15 tugiye kumara, tuzirikane ko ibyo umunyarwandakazi bizatuma agera ku nzozi ze byihuse”.
Umushitsi mukuru akaba n’Umuyobozi w’Akarere ka Musanze, Bwana NSENGIMANA Claudien yagarutse ku nsanganyamatsiko y’umunsi mpuzamahanga w’umugore wo mu cyaro. Yagaragaje ishusho y’umuryango mwiza, atanga inama n’impanuro. Yagize ati: “Umunsi mpuzamahanga w’umugore wo mu cyaro twaje kuwizihiriza hano mu murenge wa Muko, ni ku nshuro ya28 tuwizihiza hano iwacu mu Rwanda. Mboneyeho gushimira abaturage b’uyu murenge uburyo mwitabira gahunda za Leta, mbashimira n’uburyo mu miryango mubanye neza”.
Akomeza agira ati: “Mukomeze mubane neza mu miryango yanyu, ubutumwa mpaye abaturage b’Akarere ka Musanze kandi mwirinde ingeso mbi z’ubusinzi n’uburaya kuko ni ingeso zikigaragara hamwe na hamwe mu miryango; Nsabe kandi abantu bakora n’abakinywa inzoga z’inkorano, zimwe zitujuje ubuziranenge kuzireka kuko nizo ntandaro y’amakimbirane mu miryango. Bityo rero, mushire imbere umurimo.
Umunsi nk’uyu kandi utubere umunsi tuzirikana ko umuryango ari isoko y’iterambere: Dushishikarize abana kujya ku ishuri, tubarinde imirimo ivunanye no tubatesha ishuri kuko kutabitaho ngo mubabonere ibikenewe byatumye Akarere kacu ka Musanze kaba akanyuma mu bizamini bisoza icyiciro rusange cy’amashuri yisumbuye; Twita ku isuku mu miryango n’ahandi.
Umugore w’agaciro: Ni umugore ufite ubwiherero; Umugore utararana n’amatungo kandi utarwaje bwaki. Uyu munsi k’umugore wo mu cyaro, ni umwanya mwiza wo kugira ngo umugore abone igishoro; Umwanya mwiza wo gutekereza ku kubyara abo ashoboye kurera atitwaje ya masomo yo muri Bibiriya avuga ngo ‘Tubyare twuzure isi’, isi yawe uyu munsi ni ubutaka utunze cyangwa ubushobozi ufite”.
Umuyobozi w’Akarere ka Musanze kandi yakanguriye abayobozi n’abafatanya bikorwa kurushaho kwita ku mugore wo mu cyaro kuko gufasha umugore ari ugufasha igihugu, akomeza anakangurira abagabo gufatanya n’abagore babo mu bikorwa biganisha ku iterambere ry’umuryango; Yakanguriye kandi abaturage gutanga ubwisungane mu kwivuza, aho yavuze ko mu karere ka Musanze hari 10% bataratanga Mituelle de sante. Yanakanguriye imiryango kwizigamira muri ejoheza, aho yashimiye abaturage bo mu murenge wa Nkotsi ku kuba ari abambere mu ntara y’Amajyaruguru;
Ku kibazo cy’isuku, nk’uko byemejwe mu ngamba zafashwe: Hemejwe ko muri uko kwezi, bitarenze tariki 31/10 mu miryango irenga ibihumbi 2,500 imiryango igera kuri 200 ikaba itagira ubwiherero izaba yabubonye. Yasoje avuga ko turi mu kwezi k’Ubumwe; Ubwiyunge n’Ubudaheranwa, bityo abasaba gukomeza kubuharanira kuko arizo mbaraga zabo.
Muri uyu muhango kandi hatanzwe ibihembo ku miryango yagaragayemo abagore b’indashikirwa: Hatanzwe inka5; Ihene 9 n’intama 4. Hatanzwe imbabura 50 za cana rumwe, mu rwego rwo kurengera ibidukikije no kurinda indwara z’ubuhumekero; Hatangwa uduseke turimo imbuto(), nk’ikimenyetso cyo kwifuriza uburumbuke abahawe inka.
Ni umuhango wabayemo ibyiza byinshi nk’umuvugo mwiza “Nuwagaciro”, wavuzwe na Madamu NYIRANGENDAHIMANA Constance; Imbyino n’umudiho byiza byasusurukije abatabiriye ibirori, ni ibirori byasojwe n’ubusabane abantu bica isari n’inyota.
