Muri Matayo 7:24-27, hagira hati: “[24]“Nuko umuntu wese wumva ayo magambo yanjye akayakomeza, azaba nk’umunyabwenge wubatse inzu ye ku rutare;
[25]imvura iragwa, imivu iratemba, umuyaga urahuha, byose byikubita kuri iyo nzu ntiyagwa, kuko yari ishinzwe ku rutare;
[26]“Kandi umuntu wese wumva ayo magambo yanjye ntayakomeze, azaba ari nk’umupfapfa wubatse inzu ye ku musenyi;
[27]imvura iragwa, imivu iratemba, umuyaga urahuha, byose byikubita kuri iyo nzu iragwa, kandi kugwa kwayo kwabaye kunini.”
MU BIBAZO UFITE UBONA BITERWA N’IKI? ESE WUBATSE KU RUTARE MU BURYO BUKWIRIYE IMIYAGA IKABA IKUMEREYE NABI?
Hari ibibazo umuntu abamo kubera adakijijwe nubwo hari ababa mu rusengero bakibeshya ko bakijijwe.
Ese mu muryango wanyu ubonamo gukenyuka bikabije? Ese ubonamo kugumirwa bikabije? Ese ubonamo ubukene bukabije? Ese ubonamo ubujiji bukabije? Ese ubonamo Ubusinzi bukabije? Ese ubonamo Ubusambanyi bukabije? Ese ubonamo Kwiyahura? N’ibindi bisa nk’ibyo?
Birashoboka ko umuryango wawe utubatse ku rutare arirwo Yesu Kristo ahubwo mukaba mukiri mu kirere cyo guterekera, kubandwa n’ibindi bikorwa by’umwijima bitandukanye.
UMURYANGO WAWE NAWE UBAWE MWIHE YESU KRISTO, IMIGOZI MYINSHI IZACAGAGURIKA
Iyo migozi ikuboshye cyangwa iboshye umuryango wawe nta kindi kizayicagagura usibye Yesu Kristo. Tura umuryango wawe nawe ubwawe Yesu Kristo nibwo imiryango satani yinjiriragamo abiba, abica cyangwa ashaka kubarimbura izafungwa.
ESE UBA MU RUSENGERO ARIKO SATANI AKABA AKOMEJE KUKWIGIRIZAHO NKANA?
Niba usenga kandi ukijijwe ariko satani akaba akomeje kukwigirizaho nkana wisuzume niba hatari imiryango ifunguye (Ahari uracyabeshya; Uracyasambana; Urakiba; Ujya ugira amanyanga; Uracyaba mu bapfumu; Uracyanywa inzoga; Itabi n’ibindi …)
Ikindi ushobora kuba utabikora ariko bigaca mubo mufitanye amasano kuko nabo imiryango yabo ifunguye ishobora kukugiraho ingaruka mu buryo bumwe cyangwa ubundi.
NUBA UHAGAZE NEZA UGASENGA CYANE, NTAKABUZA IGIHE CY’IMANA KIZAGERA UBOHORWE.
Irinde kandi urinde n’abawe cyangwa niba abawe bakomeje gufungura imiryango satani akakugezaho imijugujugu, ubihakane kandi witandukanye nabo mu mwuka. Nubikora maze ugasenga cyane, imigozi Yesu Kristo azayicagagura ubohoke burundu maze winjire mu buzima bw’ibitangaza gusa. Iki gihe icyo uzagerageza gukora cyose kizakubera kiza.
Ndagukunda mwene data muri Yesu Kristo. Imana iguhe umugisha!
Yari Pastor Alphonse HABYARIMANA.
