Urupfu rwa Colonel Ruterera, wari ufungiye muri gereza ya Ndolo i Kinshasa rukomeje guteza agahinda no gukurura impaka mu Banyamulenge ndetse no mu bantu bakurikiranira hafi ibibazo bya politiki n’umutekano mu burasirazuba bwa Repubulika Iharanira Demokarasi ya Congo.
Mu butumwa yanditse agashyikiriza Minembwe Capital News, Captain Ndinzabera Mayunga, umwe mu basirikare ba MRDP_ Twirwaneho iyobowe na General Charles Sematama uzwi ku izina rya Intare Batinya, yagaragaje akababaro yatewe n’urupfu rwa Colonel Ruterera. Yihanganishije umuryango wa nyakwigendera ndetse n’Abanyamulenge bose muri rusange.
Yagize ati: «“Ndagusuhuje Bwana munyamakuru wa Minembwe Capital News. Twumvise amakuru y’inshamugongo avuga ko Colonel Ruterera yitabye Imana. Aya makuru yambabaje cyane, ariko nta kindi twakora uretse ukwihangana.”»
Captain Ndinzabera yakomeje avuga ko urupfu rwa Colonel Ruterera ari igihombo gikomeye ku Banyamulenge, amugaragaza nk’umuntu wafatwaga nk’intwari kandi waranzwe n’umurava ndetse n’ubwitange mu nshingano ze.
Yagize ati: «“Nihanganishije Abanyamulenge bose aho bari hose. Birababaje kumva ko Colonel Ruterera yaguye muri gereza ya Ndolo. Njye namumenye nk’umuntu wari intwari kandi ugira ishyaka. Mwe banyamakuru, mwihanganishe umuryango we ndetse n’Abanyamulenge bose.”»
Mu butumwa bwe, Captain Ndinzabera yanagarutse ku bibazo bijyanye n’ifungwa rya Colonel Ruterera ndetse n’uko abona ikibazo cy’imibereho n’imiyoborere bireba Abanyamulenge muri Repubulika Iharanira Demokarasi ya Congo.
Nk’uko amakuru yegeranyijwe na Minembwe Capital News abigaragaza, Colonel Ruterera yafunzwe mu mwaka wa 2023, nyuma aza kujyanwa muri gereza ya Ndolo i Kinshasa. Kugeza ubu, impamvu zose zatumye afungwa ntizigeze zitangazwa ku mugaragaro n’inzego zibifitiye ububasha.
Ku wa kane tariki ya 16/07/2026 ni bwo hatangiye kumvikana amakuru y’urupfu rwe.
Umwe mu bagize umuryango wa Colonel Ruterera yabwiye Minembwe Capital News ko ubuyobozi bwa gereza bwabamenyesheje ko yapfuye azize uburwayi yari amaze igihe gito arwaye. Icyakora, uwo muryango wavuze ko kuva yafungwa utigeze uhabwa ibisobanuro birambuye ku bijyanye n’impamvu z’ifungwa rye cyangwa imiterere y’uburwayi bwamuhitanye.
Urupfu rwa Colonel Ruterera rwongeye kuzamura ibiganiro ku mibereho y’abafungiwe muri gereza zo muri RDC, ibibazo birebana n’ubutabera ndetse n’iyubahirizwa ry’uburenganzira bwa muntu. Bamwe mu bakurikiranira hafi iki kibazo basabye inzego zibishinzwe gutanga ibisobanuro birambuye ku rupfu rwe ndetse hagakorwa iperereza ryigenga kugira ngo ukuri ku byabaye kumenyekane.
Mu gihe umuryango wa nyakwigendera ukomeje icyunamo, ubutumwa bwo kumwibuka; Kumuha icyubahiro no kwihanganisha abe bukomeje gutangwa n’abantu batandukanye. Hagitegerejwe kandi ibisobanuro birambuye bitangwa n’inzego zibishinzwe ku byerekeye urupfu rwa Colonel Ruterera, natwe muri Karibumedia turakomeza kubakurikiranira iby’uru rupfu.
Karibumedia
