Kuri iki cyumweru tariki ya 30/08/2026, ku nshuro ya kabiri ishuri Morning Star Academy riherereye mu karere ka Burera mu murenge wa Gahunga ahitwa KANYIRAREBE ryakoze ibirori “Graduation” ku bana24 basoje icyiciro cy’amashuri y’inshuke.
Ibirori twavuga ko byari bigizwe n’ibice bitatu, aribyo: Akarasisi “Parade”; Imikino y’abana n’ibiganiro; Gutanga impamyabumenyi “Certificate” n’ubusabane. Ibirori byabimburiwe n’akarasisi “Parade” kakereje abagenzi, batangiriye ku kigo cy’ishuri berekeza mu murenge wa Rugarama mu birometero bibiri(2km) uvuye ku ishuri bagarukira ahitwa Gitesani; Bahindukiye, basoreza akarasisi muri Centre ya KANYIRAREBE. Ibirori byakomereje ku kibuga cy’ishuri kugeza birangiye.
Ibi birori byitabiriwe n’abana; Ababyeyi; Abarimu; Inshuti n’abaturanyi b’ishuri, Umuyobozi w’ishuri akaba na nyiraryo mu ijambo ry’ikaze yashimiye abitabiriye ibirori kandi abaha ikaze mu kigo cye. Umushitsi mukuru muri ibi birori yari Bwana KAYITSINGA Faustin, Umunyamabanga Nshingwabikorwa w’Umurenge wa Gahunga wahageze mu gice cya kabiri cy’ibirori atanga ubutumwa kandi afatanya n’Umuyobozi w’ishuri Morning Star Academy gutanga certicate.
Mu ijambo rye Umuyobozi w’ishuri, Madamu NZAYISENGA José yahaye ijambo Perezida w’inama y’ababyeyi Bwana NSHIMIYIMANA ngo atange ubuhamya n’impanuro ku babyeyi n’ababndi bitabiriye ibirori.
Mu ijambo rye Bwana NSHIMIYIMANA yashimiye ubuyobozi bw’ishuri, maze agaragaza imbamutima ze n’iz’ababyeyi bagenzi be muri aya magambo: Yagize ati: “Mu izina ry’ababyeyi bagenzi banjye, turashima ubuyobozi bw’ishuri bwagize igitekerezo cyiza cyo kutuzanira iri shuri; Ndashima abarezi “abarimu” biri shuri bakoze umurimo ukomeye wo kudufasha aba bana kuko twababazaniye ari bato batazi kuvuga neza, aho babanye nabo bakaba babagejeje ku rwego rwo kuba ari abana baciye akenga; Abana badidibuza icyongereza, ubu bakaba bagiye gutangira amashuri abanza.”
Bwana NSHIMIYIMANA yakomeje agira ati: “Sinabura gushimira ababyeyi bagenzi banjye, bagiriye ishuri icyizere bakarizanira abana batazi no kuvuga neza ubu bakaba ari intyoza kandi namwe murabibona no mu mikino batweretse. Babyeyi rero, ni inshingano zacu ngo dushakire abana bacu ibikenewe byose ngo bazabashe kurangiza neza ikindi cyiciro batangiye cy’amashuri abanza. Ibi nibyo bizatuma tubabonaho umusaruro ushimishije, aho bazabasha gutsinda neza ibizamini bya Leta bisoza amashuri abanza.”
Mu kiganiro Umuyobozi w’ishuri Morning Star Academy yagiranye n’Umunyamakuru wa Karibumedia.rw yamutangarije ko ishuri Morning Star Academy rifite intego n’imigambi byo guteza imbere ireme ry’uburezi, rizmura abana mu kuvuga neza ururimi rw’icyongereza ndetse bunabakurikirana mu kubatoza Uburere n’Imico myiza bufatanije n’ababyeyi.
Yagize ati: “Iri shuri twaritekereje ari uko tubona rikenewe muri aka gace, tubifashijwemo n’Imana ku wa 03/09/2024 rifungura imiryango n’abana 54; Nyuma y’umwaka twari dufite abana 126, ubu dufite abana 276. Morning Star Academy twatangiye dufite abakozi 6, ubu dufite abakozi 12. Hamwe n’ababyeyi; Abarimu ndetse n’ubuyobozi, tuzafasha abana kubaha Uburezi n’Uburere bifite ireme ku buryo imico yabo izaba iberanye n’indangagaciro z’umunyarwanda ubereye u Rwanda.”
Madamu NZAYISENGA José, yafashe umwanya ashimira ababyeyi; Ubuyobozi bw’uUmurenge; Akarere na Nyakubahwa Perezida wa Repubulika y’u Rwanda, wahaye abagore ijambo.
Aho yagize ati: “Ndashimira byimazeyo ababyeyi batugiriye icyizere, bakaduha abana babo ngo dufatanye kubarera kandi tubigishe; Ndashimira Ubuyobozi bw’Akarere bwatwemereye tugatangiza ishuri Morning Star Academy; Nganashimira Ubuyobozi bw’Umurenge wa Gahunga butahwemye kuduha inama no kituba hafi. By’umwihariko nkaba nshimira Umukuru w’Igihugu cyacu Nyakubahwa Perezida wa Repubulika y’u Rwanda Paul KAGAME wahaye umugore ijambo, aho ku myaka 34 Njyewe José natinyutse gushinga ishuri nK’iri bigshoboka kandi bikemera Imana izaduhe kumuhorana.”
Umuyobozi w’ishuri yavuze imigabo n’imigambi by’ikigo cye, aho yatangarije abitabiriye ibirori ko muri uyu mwaka w’amashuri 2025/ 2026 ko yabonye ikibanza akaba yiteguye gushiramo inyubako/ amashuri atanu ku buryo mu kwezi kwa 04/2027 azaba yuzuye. Ko ndetse atari ibyo bikorwa akora gusa, ahubwo ko no mu bikorwa by’Imibereho myiza y’abaturage Morning Star Academy idasigara inyuma.
Yagize ati: “Twatangiye tutagira inyubako dukodesha inzu z’umuturage, ubu twaguze ikibanza tariki ya 15/07/2026 twatangiye imirimo yo kubaka bizagera 04/2027 dufite inyubako z’ibyuma by’amashuri bitanu(5); Morning Star Academy tunafasha Leta mu bikorwa by’Imibereho myiza y’abaturage, twafashije abana bo mu miryango itishoboye biga mu kigo cy’amashuri ya Nyangwe ‘Groupe Scolaire Nyangwe’ hamwe na KARIBUMEDIA tubagurira imyenda y’ishuri ifite agaciro k’ibihumbi magana abiri na mirongo itandatu ‘260,000frw.’
Uyu mwaka twiteguye kurihira ubwisungane mu kwivuza abaturage bo mu miryango itanu, babiri bo mu kagari ka Nyangwe na battu(3) bo mu kagari ka Buramba; Tuzafasha kwishurira ifunguro rya saa sita ‘School feeding’ abana mirongo itatu(30) bo mu miryango itishoboye, ni abana biga mu kigo cy’amashuri abanza ya Musanzu.”
Mu gusoza yahaye ikaze Umuyobozi w’Umurenge wa Gahunga, Bwana KAYITSINGA Faustin akaba ari Umunyamabanga Nshingwabikorwa w’uyu murenge ngo ageze ku bitabiriye ibirori ijambo nyamukuru ry’umunsi.
Bwana KAYITSINGA Faustin, yagize ati: “Ndashima mbikuye ku mutima umuyobozi w’iri shuri wagize igitekerezo cyiza cyo gushinga ishuri Morning Star Academy, yaratinyutse rwose nk’umugore kandi Ubuyobozi bw’Umurenge twiteguye gukomeza kumufasha. Nshimire namwe ababyeyi mwazanye abana kuri iri shuri kuko bigaragara ko mwatangiye kwinjira mu irushanwa ‘Competition’ n’andi mashuri atanga ubumenyi bwo hejuru, mu bihe biri imbere abana banyu bashobora kuzavamo ababa abambere mu bizamini bya Leta.”
Yakomeje agira ati: “Kwigisha umwana ni ishoramari rirambye/ Ry’igihe kirekire, Abahanga bakunze kuvuga ko ushaka guteganyiriza umwaka umwe(1an), ahinga umuceri; Ushaka guteganyiriza imyaka icumi(10ans), atera igiti naho ushaka guteganyiriza imyaka ijana (100ans), yishura ishuri.”
Abaturage babwiwe ko ishooramari rya mbere ari ishuri, Umuyobozi w’Umurenge aboneraho kubwira abaturage kwirinda ubusinzi n’ingeso mbi.
Yabwiye abitabiriye ibirori ko nta musinzi wazana umwana mu ishuri nk’iri, yasabye abaturage kwirinda ubusinzi; Kwirinda ibiyonyabwenge n’Inzoga z’inkorano kandi zitujuje ubuziranenge, maze asaba ababyeyi n’abarimu kwita ku burere bw’abana babakundisha ishuri kuko ari Rwandarwejo.
Bwana KAYITSINGA Faustin, Umunyamabanga Nshingwabikorwa w’Umurenge wa Gahunga.
Yagize ati: “Reka mbahe urugero mpereye ku nzego z’Umutekano “Ingabo na Polisi”, nta muntu wajya muri izi nzego atarize. Uyu munsi mu Rwanda nta butaka tugira, umurima wacu ni mu mutwe. Umutekano dufite dusagurira n’abanyamahanga, abana bacu bajyayo bakazana amafaranga. Ndabasaba rero ngo mukomeze mukore ishoramari mwishurira abana banyu amafaranga y’ishuri.
Ndagaruka ku muyobozi washinze iri shuri kuko ashigikiye Gahunda ya Leta ijyanye n’uburezi kuri bose kuko ntiyita ku bana biga iwe gusa, numvise ko afasha n’abo mu bindi bigo. Kera nta mwana wa ngofero wigaga, higaga umwana wa Burugumesitiri n’ab’abandi bategetsi ariko ubu higa abana batsinze/ bazi ubwenge ni Gahunda y’Igihugu cyacu yimakajwe n’Umukuru w’igihugu akaba na Perezida wa Repubulika y’u Rwanda, Nyakubahwa Paul KAGAME.”
Umuyobozi w’Umurenge wa Gahunga kandi yaboneyeho gushimira abarezi kuko kugira ngo umuntu abe umuntu ufitiye abandi akamaro kandi akagirire n’Igihugu ni uko aba yaraciye imbere ya mwarimu, ati: “Imbere ya mwarimu tuhamara igihe kinini kugira ngo tube abo turibo, bagirira abandi akamaro n’Igihugu muri rusange; Ndashimira kandi n’abana basoje icyiciro cy’amashuri y’inshuke kuko ni intambwe ya mbere bateye bana mukomereze aho.”
Ibirori byasojwe hatangwa impamyabumenyi “Certificate” ku bana 24, zatanzwe n’Umuyobozi w’Umurenge wa Gahunga afatanije n’Umuyobozi w’ishuri Morning Star Academy. Hakurikiraho ubusabane ku bitabiriye ibirori bose, ababyeyi n’abashitsi biyemeje gukomeza kurerera mu ishuri Morning Star Academy.
Ushaka kwandikisha umwana, wagera ubuyobozi bw’ikigo cyangwa ugahamagara 0787535692; 0725008866.
Karibumedia.rw
