Umurenge wa Rwaza, Akagari ka Nyarubuye mu mudugudu wa Bukoro, ho mu karere ka Musanze haravugwa akarengane ku baturage bitewe na Company ya ABC Multipurpose Ltd icukura ibumba ryo kubakisha no kubumbamo amatafari mu buryo butemewe. Uyu Rwiyemezamirimo yafashe amasambu y’abaturage ku gahato azanamo imashini arahingagura, yangiza imitungo yabo ndetse bamwe basigara mu manegeka .
Rwiyemezamirimo yabikoze ubuyobozi bw’umurenge burebera, atuma bikekwa ko waba ari “Umugambi mubisha wa NDUMUJURA!” Uyu mugambi twakunze kuwugarukaho muri Karibumedia.
Umunyamakuru wa Karibumedia yamenye iby’iki kibazo asura kariya gace, maze iganira n’abaturage bagera ku munane (8), abo barimo: “Habimana Jean Paul; Mutabazi Emmanuel; Nkurunziza Jérôme; Maniragaba Gervais; Iyamuremye Immaculée; Nyiramana Christine; Iradukunda Jean de Dieu; Mutuyimana Béatha na Twagirayezu Valens.”, badutangariza akababaro kabo ndetse babwira umunyamakuru ko babona harimo ukuboko kwa Gitifu w’umurenge, aho bamutakambiye akabuka inabi ababwira ko ataha agaciro ibyo bamubwira kubera ko Rwiyemezamirimo asora ariko bo akaba ntacyo binjiza muri Leta.
Umuturage yagize ati: “Inshuro nyinshi twegereye ubuyobozi buratwirengagiza, rimwe twitabaza umuyobozi w’Akarere ka Musanze ahamagara Gitifu amusaba kutwumva no gukemu ikibazo cyacu. Tweze imbere ya Gitifu, aradushihura atubwira ko Meya atamurusha ububasha mu murenge we ahubwo adutegeka kwicarana na Rwiyemezamirimo tukumvikana akaduha ingurane.”
Uyu muturage yakomeje agira ati: “Wabonaga ari igitutu n’agahato kuko ari Gitifu na Rwiyemezamirimo, aho twari twicaye kwari ukutubwira nabi ko utazemera ashobora no gutwarwa mu kigo cy’inzererezi ‘Transit center ya Kinigi’.”
Aba baturage ibyabo ubona bibabaje kandi bitumvikana kuko no mu mafaranga bumvikanye na Rwiyemezamirimo yose ntibayahawe.
Undi muturage yagize ati: “Twumvikanye miriyoni ebyiri n’ibihumbi magana atandatu “2,600,000frs”, yampaye miriyoni na magana atandatu gusa “1,600 ,000frs andi ntayo yampaye kandi hashize igihe.”
Akomeza agira ati: “Ubu ntaho mfite nakinga umusaya, yanshize mu manegeka k’uburyo ayo mafaranga yampaye ntacyo yamariye kuko ntaho nari kuyerekezanya kandi kugeza ubu ibibanza birahenze ndetse n’ibikoresho byarahenze. Igiti cyaguraga igihumbi ‘1 000frs’, ubu kiragura ibihumbi bitanu ‘5 000frs’ Mbese urebye ni Gitifu uduhagamye, aho kuturengera nk’abaturage ayobora”.
Umutungo w’umuntu ni ntavogerwa!
Nshingiye ku ngingo ya 29 y’Itegeko Nshinga rya Repuburika y’u Rwanda ryo ku wa 04/06/2013 nk’uko ryavuguruwe kugeza ubu, bivugwa ko “Umutungo w’umuntu ari ntavogerwa.”
Biri mu nshingano z’Ubuyobozi gufasha umuturage nk’uko biteganywa n’ingingo ya 13 y’Itegeko Nshinga rya Repuburika y’u Rwanda ryo muri 2003 nk’uko ryavuguruwe muri 2015, aho bivugwa ko “… Umuntu ari Umunyagitinyiro kandi ari Intahungananywa. Leta ifite inshingano zo kumwubaha no kumwubahisha.
Umunyamakuru yabajije abaturage icyifuzo, bamusobanurira ko bifuza ko ayo masezerano yasubirwamo cyangwa agaseswa, Rwiyemezamirimo akaryozwa imitungo yabo yangirije kuko amasezerano yakozwe ku gitugu ndetse hari n’abatarayagiranye nawe.
Rwiyemezamirimo ashaka indonke mu mitungo y’abaturage.
Umunyamakuru wa Karibumedia yaganiriye n’abaturage benshi, ikigaragara ni uko uriya Rwiyemezamirimo yagiye mu mitungo yabo atarabishura. Ikindi cyagaragaye n’ibaruwa Umuyobozi w’Akarera ka Musanze yandikiye Rwiyemezamirimo amuhagarika kongera gucukura muri kiriya kinombe kuko abikora binyuranije n’amategeko ndetse no mu buryo bushira ubuzima bw’abaturage mu kaga. Ubwo twakoraga iyi nkuru twamenye ko Rwiyemezamirimo ari mu maboko ataraye kubera umukozi waguye muri icyo kinombe ku wa 06/06/2026, ubu afitwe na RIB/ Sitation ya Muhoza ahazwi nko muri Groupement.
Ubuyobozi bubivugaho iki?
Ibi bibaye mu gihe Meya NSENGIMANA Claudien, ku wa 25/05/2026 yari yandikiye Rwiyemezamirimo ibaruwa imuhagarika gucukura by’agateganyo kubera kutuzuza ibisabwa ndetse Meya amenyesha inzego bireba, harimo na Gitifu w’Umurenge wa Rwaza nk’uko byagaragaye mu bugenzuzi bwakozwe ku wa 06/05/2026. Mu byo atujuje, harimo: Kwangiza imitungo y’abaturage; Kubashira mu manegeka; Gukora mu buryo bushira ubuzima bw’abakozi mu kaga; Kwangiza ibidikikije n’ibindi… Ibintu bigaragara ko Gitifu atigeze aha agaciro ibaruwa Meya yanditse.
Ni ukubera iki Umuyobozi w’Umurenge wa Rwaza, atumva ikibazo cy’abaturage?
NKURUNZIZA Faustin, ni Umunyamabanga Nshingwabikorwa w’Umurenge wa Rwaza. Umunyamakuru wa Karibumedia yagerageje kuvugana nawe ariko nta makuru yuzuye yamuhaye. Mu butumwa bugufi yamuhaye, byagaragaye nabwo ko ashaka gushira iterabwoba k’umunyamakuru.
Gitifu aratwandikira ati: “Kereka niba harikindi ugamije mu nyungu zawe bwite, ariko ibyo nasobanuye muri audio niko biri kndi uretse n’abo baguhamagaye, twebwe dushinzwe abaturage bose tubereye abayobozi,
Ntabwo kuba umunyamakuru biguha ububasha bwo kumpa amabwiriza no gushira iterabwoba ku bayobozi !!
Nizere ko bitazongera !”
Arongera aratwandika agira ati: ” Ok, twubahane buriwese mu nshingano ze kndi ntiwabuza umuturage kugaragaza amarangamutima ye, ariko ntabwo gushira umuturage ku isonga ntibisobanuye kwirengagiza amategeko !
Mugire amahoro”
Urajya/ Urihisha he mujura!?
Muri Karibumedia tumaze igihe tuvuga “Umugambi mubisha wa NDUMUJURA”, uyu akaba ari Umugambi wimakazwa cyane n’abifiye ubushobozi n’abihaye ububasha barengereye itegeko. Hamwe n’ibi byose, igihe tugifite abayobozi batumva ikibazo cy’umuturage intero ntizaba ngo “Umuturage ku Isonga”, ahubwo hazavugwa ngo: “Umuturage ku musonga”. Abaturage bo muri uriya murenge wa Rwaza, cyane hariya hari kiriya kinombe ni abo gusurwa bagahumurizwa kuko bari mu kaga.
Nshingiye ku ngingo ya 22 y’itegeko Nº 18/2007 ryo ku wa 19/04/2007, ryerekeye kwimura abantu ku mpamvu z’inyungu rusange, aho bivugwa ko: “Agaciro k’ubutaka n’ibikorwa biriho byimurwa kubera impamvu z’inyungu rusange bibarwa hakurikijwe ingano; Imiterere n’igiciro kiri ku isoko.”
Nshingiye ku ngingo ya 24 y’Itegeko ryavuzwe haruguru, iteganya ko uwimurwa agomba kwishirwa mu mezi atatu mbere y’uko umutungo we n’ibiwuriho bifatwa nk’inyungu rusange.
Muri iyi Company kandi ngo hari uwitwa MANIZABAYO Emmanuel agenda uvuga ko bakorana na ba KIBAMBA, uyu akaba ariwe ufatwa nka nyirayo. Turi mu gihugu kigendera ku mategeko, turibaza ngo “Uwo muntu ninde uzabamba abaturage kubera guharanira uburenganzira bwabo ku mitungo yabo bwite!??” Imitungo yigabijwe n’abantu ku bw’indonke zabo. Ntawe, nta nubaho! Umugambi mubisha wa NDUMUJURA wamenyekanye, hamwe na Karibumedia tuvuge tuti: “Urajya/ Urihisha he mujura!? Dutegereze ibirakurikiraho.
Karibumedia
