Ikigo kizwi nka “RED ROCKS” giherereye mu murenge wa Nkotsi mu karere ka Musanze nk’uko byakozwe n’ahandi hirya no hino mu gihugu, cyijihije umunsi mukuru w’umuganura mu nsanganyamatsiko igira iti: “Umuganura 2026, Isoko y’Ubumwe n’ishingiro ryo kwigira”, aho cyaganuje abagituriye ndetse n’abanyamahanga bakigana mu rwego rw’ubukerarugendo bushingiye ku muco.
Mu mateka y’u Rwanda, Umuganura wari umwe mu mihango ikomeye yahuzaga umuryango nyarwanda nyuma yo gusarura aho abaturage bajyanaga umusaruro wabo i Bwami bashimira Imana y’i Rwanda n’Umwami, bityo bagasabana basangira ibyo bejeje.
Umuganura ni imwe mu nzira 18 zari zigize inzira z’ubwiru mu Rwanda mu gihe cy’ingoma ya cyami, ukaba n’umuhango wari utagamije kwishima gusa basangira ibyabonetse ahubwo wari n’umwanya wo gushimangira imikomerere y’igihugu hashimangirwa umuco wo gufatanya; Kubaha umurimo no gusangira ibyiza bagezeho.
Umuganura wagiraga uruhare rukomeye mu guhuza Umwami; Abatware na rubanda kuko Umwami yaberekaga ko abubashye cyane abavugira umutsima muri ibyo birori akabagaburira bagasangira bagasabana noneho rubanda nabo bagakusanya ku myaka bejeje bakajyana i Bwami mu rwego rwo gushimira Umwami ko ari we Nyiruburumbuke no kororoka.
Karibumedia.rw yanyarukiye ku kigo cya RED ROCKS, aho uyu muhango wo kuganuza abaturanyi waberaga maze ihasanga imbaga y’abaturage b’abanyarwanda n’abanyamahanga (Abazungu) bahimbawe, basangira ibinyobwa gakondo ndetse n’ifunguro rya kinyarwanda kandi byose biteguwe neza maze iganira na bamwe muri bo bavuga ibyo bamaze kugezwaho n’iki kigo.
Nyiramajyambere Marie Louise yagize ati: “Kuri uyu munsi mukuru w’umuganura, ikigo Red Rocks cy’ubukerarugendo bushingiye ku muco, twishimira ibyo kimaze kutugezaho kuko ibijyanye n’umuco tumaze kubigira ibyacu. Twenga urwagwa rwiza; Dutegura ibiryo nyarwanda kandi n’abo banyamahanga bakabikunda ndetse bakabitwara n’iwabo mu mahanga kandi tugafatanya kubitegura mu rwego rwo kubigisha uko bitekwa, bakadusigira amadorari.”
Nyiramajyambere yakomeje avuga ko bategura ibinyobwa n’ibiribwa byujuje ubuziranenge kandi ko Red Rocks yabakuye ahakomeye.
Yagize ati:” Twebwe dutegura ibinyobwa n’amafunguro yujuje ubuziranenge kuko nk’urwagwa ntiturukora nk’abo twumva bavuga hirya no hino ahubwo twebwe turarwenga kuko dutegura ibitoki tukabitara, byamara gushya tukabikuramo umutobe ari nawo dushyiramo ifu y’amasaka twihingiye, tukayasya ku rusyo rwa kinyarwanda nyuma tugatara noneho ku munsi wa gatatu tugahogorora (tukavunura) rwa rwagwa rw’umwimerere rwateguranwe isuku kandi mu bikoresho bifite isuku. Navuga ko Red rocks yaziye igihe mu giturage cyacu kuko ibyo dukora byose bituzanira amafaranga adufasha mu iterambere ry’imiryango yacu.”
Biseruka Emmanuel we yagize ati: “Buri mwaka ku munsi w’umuganura abenshi duhurira aha tukaganura ku byo twejeje biteguranye isuku kandi bijyanye n’umuco nyarwanda birimo ibinyobwa nyarwanda (by’umwimerere) bifite ubuziranenge. Ni nayo mpamvu tuvuga ko Red rocks nk’umufatanyabikorwa hari aho yadukuye hari n’aho atugejeje. Nka njye ndi intore, nigisha abazungu guhamiriza; Kuvuza ingoma; Guteka indyo nyarwanda n’ibindi. Ni no muri urwo rwego dusaba abakora ibinyobwa bitujuje ubuziranenge kubireka ahubwo bakatugana, tukabereka uburyo ibyo binyobwa gakondo bitegurwa, aho gukora ibidafite ubuziranenge byica abantu. Ni naho mpera nsaba inzego z’ibanze gushishikariza abaturage kuza gukorera ingendoshuri hano bakiga gutegura amafunguro yuzuye n’ibinyobwa byujuje ubuziranenge.”
Ni mu gihe umukecuru Dative Bazubafite w’imyaka 66 ahamya ko hari ibyo bategura bakabitegurana n’abazungu ngo kuko baba babikunze.
Yagize ati: “Iyo turi gutegura urwagwa n’abazungu baba bareba kuko dutara ibitoki mu rwina bareba, mu minsi 6 tukabitonora kuko biba byahiye, tukabikama (kubikuramo umutobe) twifashishije imivure yacu ifite isuku, tugashyira amasaka ku rusyo rwa kinyarwanda, tugasya noneho ifu tubonye tukayishyira muri wa mutobe, tugatara na none, bityo ku munsi wa gatatu tukaba tubonye urwagwa rwiza gakondo rutagira ingaruka n’imwe kuwarunyoye. Abo bazungu nabo tugasangira ndetse bamwe bagatwaraho iwabo kuko baba barushimye.”
Bazubafite yakomeje avuga ko muri Red Rocks yahigiye byinshi byiza birimo no kwirinda kwigunga nk’umukecuru, ahubwo akirirwana n’abandi kandi akora ibimuteza imbere.
Yagize ati: “Abazungu nabo baraza tugafatanya iyo mirimo, haba gutara no kwenga ibyo bitoki; Guteka; Kubyina imbyino nyarwanda n’ibindi. Urebye, aha muri Red Rocks nahigiye byinshi aho ibivovo by’insina tubikuramo impapuro, guteka umutsima wa kinyarwanda. Mbese ni Ikigo kidutoza gukomeza kubumbatira umuco nyarwanda kandi twinjiza n’amafaranga kuko ibyinshi mu byo dukora bigurwa n’abo banyamahanga bakaduha ku madorari.”
Umuyobozi w’ikigo cya Red Rocks Bakunzi Grégoire yabwiye Karibumedia.rw impamvu yo gushinga iki kigo, aho yagize ati: “Igitekerezo cyo gushinga iki kigo cyaje giturutse ku bukerarugendo muri kano gace k’ibirunga aho twatekereje ukuntu ubukerarugendo bugenda butera imbere ariko tukabona ibikorwa byo gusigasira umuco nyarwanda bigenda bicika. Bityo, dushinga iki kigo kugira ngo abaza gusura ibyiza by’u Rwanda batazahera mu birunga gusa ahubwo bashobore no kugera mu giturage kugira ngo tubasangize umuco wacu n’amateka y’u Rwanda.”
Bakunzi yakomeje avuga ko mu kigo cyabo badaheza ko n’abo bakorana umunsi ku w’undi, ko bizanye kandi ko kuza ari ubushake.
Yagize ati: “Kwimakaza umuco bisaba kugira ubushake kuko nk’abo dufite hano barizanye n’abandi barizana ariko tuba twifuza cyane cyane urubyiruko kugira ngo rwigire ku bakuru baba hano. Ntabwo rero duheza.”
Bakunzi yasoje asaba ubuyobozi gushishikariza abanyarwanda kugana Red Rocks kugira ngo bige ku muco nyarwanda.
Yagize ati: “Turasaba ubuyobozi ko bwashishikariza abanyarwanda by’umwihariko abo mu karere ka Musanze kutugana tukabavungurira ku muco nyarwanda kuko n’abanyamahanga baraza tukabigisha kwenga urwagwa gakondo; Ikigage n’amafunguro ya kinyarwanda aryoshye kandi byose biteguranywe isuku kuko nk’urwagwa turwenga mu bitoki, tukabeteza amasaka yahinzwe n’abanyarwanda azwi nk’impeke y’umwami.”
Umuganura watangiye kwizihizwa mu Rwanda ku ngoma ya Gihanga Ngoma ijana mu kinyejana cya cyenda, hanyuma uza kongera guhabwa imbaraga na Ruganzu II Ndoli hagati y’imyaka ya 1510_ 1543 ubwo yabohoraga u Rwanda nyuma y’imyaka irenga cumi n’itanu ruri mu maboko y’abanyamahanga (Abanyoro n’Abanyabungo).
Yanditswe na SETORA Janvier
