Kwibuka ku nshuro ya 32 Jenoside yakorewe abatutsi mu Rwanda mu1994, Umukuru w’igihugu Paul Kagame yavuze ko igihugu cy’u Rwanda kidashobora gupfa ubugira kabiri ahubwo ko mbere yo kwica u Rwanda, ubitekereza yakwicwa mbere.
Nk’uko byagenze n’ahandi hose mu gihugu, kuri uyu wa kabiri, tariki ya 07 Mata 2026, mu karere ka Musanze hatangijwe icyumweru cy’icyunamo kibanziriza iminsi 100 yo kwibuka Jenoside yakorewe abatutsi mu Rwanda mu 1994.
Mu ijambo ry’ikaze, Umuyobozi w’Akarere ka Musanze Nsengimana Claudien yihanganishije abarokotse Jenoside yakorewe abatutsi mu 1994, bityo asaba abaturage kwirinda amacakubiri ahubwo bagaharanira kwiteza imbere.
Yagize ati: “Mu bihe nk’ibi ntibyoroshye kugira icyo wavuga, gusa nihanganishije abarokotse Jenoside yakorewe abatutsi kandi ntizongera kubaho ukundi; Nkaba nsaba abaturage kwirinda amacakubiri n’ingengabitekerezo ya Jenoside ahubwo mugaharanira kwiteza imbere mwihimura ku badakunda igihugu cy’u Rwanda, bityo ubumwe bwacu bugakomeza kuba imbaraga zacu.”
Uwatanze ikiganiro cy’amateka mabi yaranze u Rwanda igihe cy’abakoloni na nyuma yabo, Eric Nkurayija yavuze ko kwibuka ari inshingano za buri munyarwanda.
Yagize ati: “Kwibuka Jenoside yakorewe abatutsi mu Rwanda mu 1994 ni inshingano za buri munyarwanda nk’uko biteganijwe mu itegeko nshinga rya Repubulika y’u Rwanda ndetse rikatubuza no guhembera ingengabitekerezo ya Jenoside.”
Yakomeje avuga ko inshoza ya Jenoside ari icyaha gituruka ku mugambi wo kwica no kurimbura ubwoko; Isura; Abahuje idini n’ibindi.
Yagize ati: “Inshoza ya Jenoside ni icyaha gituruka ku mugambi wo kwica no kurimbura ubwoko; Isura; Abahuje idini….ariyo mpamvu n’umugambi wo kurimbura abatutsi bitabaye nk’impanuka cyangwa ihanurwa ry’indege ya Habyarimana Juvénal ahubwo ni igikorwa cyateguwe kandi gishyirwa mu bikorwa na Leta mbi yariho yimakaje ingengabitekerezo y’amacakubiri n’irondakoko.”
Uwatanze ubuhamya bw’uburyo yarokotse Fatuma Mukarusagara, yavuze inzira y’umusaraba yanyuzemo ubwo Jenoside yakorwaga ndetse na mbere yaho nk’umuntu wavukiye mu icyahoze ari Komini Mukingo yayoborwaga na Burugumesitiri witwaga Kajerijeri Juvénal, uburyo yahize akanica abatutsi.
Perezida wa IBUKA mu karere ka Musanze RUSISIRO Festus yavuze uko abarokotse Jenoside yakorewe abatutsi mu 1994 babayeho n’ibibazo bikihari.
Yagize ati: “Abenshi ku bacitse ku icumu rya Jenoside yakorewe abatutsi mu 1994 ni abagore kandi abenshi muri bo barashaje ku buryo ubuzima bwabo ubona ari abo kwitabwaho ndetse wareba n’amacumbi yabo, amwe amaze gusaza ku buryo turi gufatanya n’akarere ndetse n’abafatanyabikorwa kugira ngo tubikorere ubuvugizi. Muri uko gusaza kwabo rero, niba bagishoboye no gukora, ni naho tuba dukomeza gukora ubuvugizi yenda nka MINUBUMWE igerageze yongere inkunga y’ingoboka bahabwa kugira ngo babashe kubaho.Ku bafite amacumbi ashaje, twagerageje kuvugana n’akarere nako kegera abafatanyabikorwa ku buryo inzu zigera kuri 98 zishaje cyane muri iyi minsi 100 zishobora gusanwa ndetse hakubakwa n’izindi nshya.”
RUSISIRO yakomeje avuga ko hari amahirwe menshi yo kuzabona imibiri y’abishwe muri Jenoside itaraboneka kubera ko hari abafunzwe bazira kugira uruhare muri Jenoside yakorewe abatutsi bagenda bafungurwa.
Yagize ati: “Kubona imibiri y’abishwe itaraboneka, byo biracyari urugendo rukomeye ariko bisaba ubufatanye n’ubumuntu bw’abanyamusanze cyane ko dufite amahirwe y’abagenda bafungurwa, yenda nitugenda tubegera bazagenda batubwira ahantu bajugunye imibiri y’abacu kugira ngo bashyingurwe mu cyubahiro.”
Umwe mubarokotse Jenoside yakorewe abatutsi MUKAYIZERE Marthe yabwiye Karibumedia.rw ko bishimira ibyo Leta y’ubumwe bw’abanyarwanda yabakoreye ariko kandi asaba abazi aho abishwe bajugunywe kuherekana dore ko nawe mu myaka 32 ishize, atarabona abe bishwe.
Yagize ati: “Nk’abarokotse, tugeze ahantu heza cyane kuko agahinda barakatumaze kuko abana bacu barize, ubu bamwe ni abagore n’abagabo kuko iyo ubabonye ukurikije uko wabatakerezaga n’uko bazabaho usanga ari ngombwa ko dushimira cyane Leta yadukoreye ibyo byose ikadukura mu bwigunge tukaba tumaze kwiteza imbere. Gusa, ikiduhangayikishije kugeza na n’ubu ni imibiri itaraboneka ngo ishyingurwe mu cyubahiro kuko nanjye ubwanjye sindabona umubiri w’umugabo wanjye n’abana banjye b’abakobwa babiri. Icyo twasaba nuko aho bigeze muri iyi myaka yose nuko ababishe cyangwa abazi aho bajugunywe, bazagerageza bakahatubwira.”
Guverineri w’Intara y’Amajyaruguru MUGABOWAGAHUNDE Maurice yashimiye abarokotse Jenoside yakorewe abatutsi mu 1994 uburyo babayeho mu iterambere ryabo.
Yagize ati: “Muri aka kanya nagiraga ngo nshimire abarokotse Jenoside yakorewe abatutsi mu 1994 ubutwari nakomeje kugira mu kudaheranwa n’agahinda ahubwo bakaba bakomeje urugamba rwo kwiyubaka biteza imbere, bateza imbere igihugu ndetse bagaharanira no kubana neza n’abandi banyarwanda.”
Guverineri MUGABOWAGAHUNDE yakomeje ashimira n’ingabo zari iza FPR-Inkotanyi zabohoye igihugu no kurokora abahigwaga.
Yagize ati: “Uyu munsi kandi ni n’umwanya dufata nk’abatuye Intara y’Amajyaruguru n’abanyarwanda muri rusange tukongera tugashimira ubutwari bw’ingabo zahoze ari iza FPR_ Inkotanyi uburyo zakoze akazi gakomeye ko kubohora igihugu no kurokora abahigwaga.Tuzahora tuzirikana ubutwari budasanzwe mwagize kandi mukomeje kugira murinda ubusugire bw’igihugu cyacu.”
Guverineri MUGABOWAGAHUNDE yashoje asaba abaturage kwirinda ingengabitekerezo ya Jenoside, abayipfobya n’abayihakana ahubwo bakaba hafi abarokotse Jenoside yakorewe abatutsi.
Yagize ati: “Ndasaba abaturage mwese gushyira hamwe mwamagana ingengabitekerezo ya Jenoside; Abayipfobya; Abayihakana n’abashaka gusenya ibyo tumaze kugeraho ndetse n’abashaka kudukururaho ibibazo bitari ngombwa. Mboneyeho kandi gusaba abaturage b’Intara yAmajyaruguru kuba hafi abarokotse Jenoside yakorewe abatutsi mu 1994 mubasuura, mubahumuriza kandi mubarinda icyabahungabanya icyo aricyo cyose.”
Mu butumwa bwatanzwe na Perezida wa Repubulika Paul Kagame aho yari ari, yavuze ko ibihe bihinduka kandi ko byahindutse ko u Rwanda rutazongera gupfa ubugira kabiri.
Yagize ati: “Ntabwo wakwica umuntu kabiri, ubigerageje azakwica mbere yo kumwica. Uko muri aha mutureba nk’uko bamwe bajya bashinyagura, bavugira hanze, igihugu cy’u Rwanda ureba ntabwo gishobora gupfa kabiri. Mbere yuko wakwica u Rwanda, nzakwica. Ari twe abakuru, ari abana bacu, ntawe uzabica kabiri. Ntibishoboka, ntibyakunda kandi uko mbivuze ni uko nguko ariko mubitwara.”
Muri uyu mwaka, mu ntara y’Amajyaruguru hari imibiri myinshi izashyingurwa ndetse n’indi ikazimurwa mu rwego rwo guhuza inzibutso aho mu karere ka Rulindo hari imibiri 2130 izashyingurwa mu cyubahiro kuwa 17 Mata 2026 mu rwibutso rwa Rusiga, na none muri aka karere hazashyingurwa indi mibiri 176 mu rwibutso rwa Mvuzo kuwa 18 Mata 2026 mu gihe mu karere ka Burera hari imibiri ibiri izashyingurwa mu rwibutso rwa Rugarama.
