Kuri uyu wa kabiri tariki ya 23/06/2026 mu karere ka Burera mu murenge wa Gahunga, ubuyobozi bwa Company “Korana n’Abakomisiyoneri Ltd” bwahuye n’abakomisiyoneri babiguze umwuga bungurana ibitekerezo ku cyatuma umurimo wabo urushaho kugenda neza no guter’imbere.
Company Korana n’Abakomisiyoneri Ltd, ni company ihuza ugurisha n’umuguzi. Iranga ibibanza; Imirima; Amazu; Inka n’andi matungo, igafasha guhuza abakozi bo mu rugo n’ababifiza n’ibindi… Kuri ubu ifite abanyamuryango igihumbi magana atatu “1,300”.
Mu ijambo ry’ikaze uhagarariye iyi Company mu karere ka Burera, Bwana MBITEZIMANA Jean yeretse bagenzi be umushitsi mukuru akaba na Nyiri Company “Korana n’Abakomisiyoneri Ltd”, Madame Honoline… maze abasaba kumwakira no kumuha ikaze iwabo. Bwana MBITEZIMANA Jean yaboneraho no kongera kwereka abashitsi komite akorana nayo anabagezaho ibibazo n’inzitizi bahura nazo mu gihe bamaze bakora.
MBITEZIMANA Jean yagize ati: “Bayobozi kandi bashitsi bahire twongeye tubishimira, muje mu gihe twari tubakeneye ngo tubagezeho ibibazo n’inzitizi duhura nazo mu kazi kacu: Uyu munsi turacyafite imbogamizi kubera abamamyi banze kwinjira muri Company ngo dufatanye, aba bamamyi bazwi ku izina ry’abasherisheri, batera urujijo mu buyobozi bw’inzego z’ibanze bigatuma batabona neza uruhare rwacu mu kurengera inyungu z’umuturage kuko nabo bavuga ko bafasha mu guhuza ugurisha n’umuguzi, bityo muziye igihe ngo mudufashe kumva uburemere bw’ikibazo kandi ni amahirwe kongera kubabona ngo muduhe inama kuri aba bamamyi.”
Yakomeje agira ati: “Ubwo muherutse inaha mwaduhaye ibikoresho, birimo: Umwenda uturanga (jure); Ikarita na Baji ndetse munadusobanurira uburyo bw’imikoranire, tubemerera ko tugiye gukora kinyamwuga ariko uyu munsi dukomeje kubangamirwa n’abamamyi bari bamenyereye kwiba abaturage, bityo turabasaba kudutiza imbaraga hagakumirwa abo bamamyi bakomeje kuzonga abaturage no kuzambya imikorere y’abakomisiyoneri biyemeje gukora kinyamwuga (Turizigama kandi tugasora)”; Ikindi tutabura kubasaba ni ukongera imbaraga mu gusobanurira ubuyobozi bw’inzego z’ibanze ndetse n’iz’umutekano mu buryo bwimbitse uruhare rwacu mu iterambere ry’igihugu kuko aba basherisheri b’abamamyi baratuzambiriza, ahubwo nabo baze muri company dufatanye dukorere mu mucyo.”
Umushitsi mukuru akaba n’umuyobozi wa company yafashe umwanya wo kumva ibibazo by’abakomisiyoneri b’umwuga, abasezeranya ko nyuma yo kumva ibibazo n’imbogamizi bahura nazo ko agiye kubafasha akegera inzego z’ubuyobozi bwite bwa Leta maze akabasaba kandi akarushaho kumvikanisha impamvu company “Korana n’Abakomisiyoneri Ltd” yabayeho n’ingamba zihari mu guhuza ugurisha n’umuguzi. Si ibi gusa kandi bahuza abakozi n’abakoresha.
Yagize ati: “Basangirangendo bacu turi abafatanyabikorwa n’inzego za Leta, turahari ngo dukumire ubumamyi ndetse n’ubujura kuko byagiye bigaragara kenshi ko abiyitirira uyu mwuga ari abajura bibisha imitungo y’abaturage ndetse n’ibibazo by’urunguze “Banque Lambert” byagiye bivugwa bariya bamamyi babyihisha inyuma. Turahari rero ngo ibyo byose tubirwanye kandi tubigaragarize inzego, maze bicike. Aha turasabwa gukora neza kandi tugakorera mu mucyo, hakagaragara itandukaniro hagati yatwe n’abariya bamamyi.”
Abaturage babona bate umukomisiyoneri wabigize umwuga?
Karibumedia yagiranye ikiganiro n’Abakomisiyoneri ndetse na bamwe mu baturage, bayitangariza ko hari impinduka zigaragara uhereye ku myitwarire yabarangaga bacyitwa abasherisheri n’aho binjiriye muri Company Korana n’Abakomisiyoneri Ltd.
Madame MUKAKIMENYI Dative ni Umukomisiyoneri wemewe wo mu karere ka Burera mu murenge wa Gahunga, yadutangarije ko aho yinjiriye muri iyi company yiteje imbere kandi ko yagize uruhare mu guhindura imyumvire n’imitekerereze y’umuturage ku ishusho bari babaziho bacyitwa abasherisheri.
Yagize ati: “Ubu ndi umudamu, nk’abandi badamu bose ubu twiteza imbere kimwe na basaza bacu: Nti tucyitinya cyangwa ngo twumve dukandamijwe, twihurije hamwe muri iyi company ngo dukumire ubumamyi, aho nk’umugabo yakuraga itungo mu rugo avuga ko agiye kuriragira agasubira mu rugo ntaryo yarigurishirije mu gasozi ariko ubu nshobora guhura n’umuntu ushoreye nk’inka nkamubaza icyangombwa cy’inzira, iyo atakinyeretse ndamufata yavuga ko ayiguze nkamubaza inyandiko yaba idasinyweho n’umukomisiyoneri icyi gihe bifatwa nk’aho yayibye, dutangira gushakisha aho ayikuye. Iyo yayiguze, tumusaba ko yishura amafaranga agenwe harimo n’igihembo cyanjye.”
Yakomeje agira ati: “Hamwe na bagenzi banjye, ubu buri cyumweru turizigama kugira ngo tuzabone mutuelle ndetse n’ukeneye inguzanyo akayihabwa muri bwa bwizigame akagenda yishura buhoro buhoro.”
Bwana BIZIMANA nawe ari muri company Korana n’Abakomisiyoneri bemewe, nawe yadutangarije ko Company yakemuye ibibazo by’amakimbirane yashoboraga kuba yavuka hagati mu miryango bitewe n’uko rimwe na rimwe umugabo cyangwa umugore yashoboraga kugurisha umutungo w’urugo batabyumvikanyeho, nyamara ibi mbere byarakorwaga umusherisheri akazana umuguzi umwe mu bafatanije umutungo atabizi.
Yagize ati: “Kenshi byabayeho, umugabo cyangwa umugore agashaka umumamyi w’umusherisheri akagurisha umurima igisinde cyangwa itungo uwo bashakanye atabizi, ibi byatezaga impagarara n’amakimbirane mu muryango bikaba bishobora no gusenya urugo, ariko ubu ntibishoboka kuko ubugure bwose buba hari umuhuza wemewe ariwe twe ababigize umwuga.”
Yakomeje agira ati: “Uyu munsi nta muturage ucunamwaho n’abamamyi biyise abasherisheri, turahari ngo dufashe umuturage ushaka kugira icyo agurisha, aratwegera tukamurangira umuguzi utaramuhenda kuko natwe tuba dushaka igihembo gitubutse.”
Karibumedia kandi yashatse kumenya uko abaturage babona itandukaniro hagati y’abasherisheri bahozeho ndetse n’Abakomisiyoneri bariho ubu, maze yegera umwe mu baturage wari wazanye itungo rye mu isoko rya Gahunga.
Umuturage witwa SEMANZA Gabriel, utuye mu mudugudu wa Kigote; Akagari ka Gisizi mu murenge wa Gahunga, yadutangarije ko hari itandukaniro ku basherisheri n’Abakomisiyoneri.
Yagize ati: “Twabaga twaremye isoko tugasanga abasherisheri mu nzira, ahitwa muri Songa bakatubwira ko mu isoko amatungo yarase kandi rimwe na rimwe batagezemo. Aba basherisheri, habaga niyo badukurikiye mw’isoko kubera ko babaga ari benshi bagatesha isoko umutwe ndetse bakaratisha amatungo yacu mu buryo bwo kuduhendesha, none aho abakomisiyoneri baziye ubu bujura bwaracitse kuko wumvikana n’umuguzi nta kibazo mwananiranwa Umukomisiyoneri akabumvikanisha mukagurirana neza.”
Yakomeje agira ati: “Abasherisheri ni abantu babi, Leta nifatanye n’Abakomisiyoneri bariya basherisheri bacike kuko bakorana n’ibisambo, akuzira mu rugo akakubwira ko akuzaniye umuguzi cyangwa aje kureba itungo ryawe ngo akurangire umuguzi naho aba aje kureba aho urizirika ngo igihe kimwe azitwikire ijoro aze arangire umujura baryibe. Rwose Leta nikomeze ifashe Abakomisiyoneri baduhashirize bariya basherisheri kuko ni ibisambo.”
Ubwo twakoraga iyi nkuru, twashatse kumenya icyo Ubuyobozi bw’Intara y’Amajyaruguru buvuga kuri iyi company yatangirijwe mu ntara y’Amajyaruguru ntibyadukundira kuko telefoni ya Governor ntiyari ku murongo. Turakomeza tuyishake kuko mu nkuru yacu itaha, tuzabagezaho uko Company ikomeje gufatanya n’ubuyobozi ndetse tunabamenyeshe niba ikibazo cy’ubumamyi cyarabonewe umuti.
Mu gusoza, Mme Honorine wari uherekejwe na Madame NAMBAJIMANA Gorette wahawe igihembo “Flat na Décodeur” nk’igihembo cy’umukomisiyoneri wo mu karere ka Burera witwaye neza, yasabye abakomisiyoneri babigize umwuga gukomeza kwitwara neza bitandukanya n’imikorere mibi iranga abasherisheri b’abamamyi.
Yagize ati: “Umukomisiyoneri akomeze abe ijisho n’umuhuza mwiza w’umukiriya “Umuguzi n’ugurisha” kandi asigasire inyungu zabo bombi ndetse n’iza company, mutungire agatoki inzego ndetse murangwe n’imico myiza y’uburere mboneragihugu ‘Indangagaciro na kirazira z’umuco nyarwanda.’ Mbasabe gukomeza kwizigama no kwiteza imbere, mbese bigaragare ko hari impinduka nziza tuzanye muri sosiyete.”
Karibumedia.
