Kuri uyu wa kane, tariki ya 30 Mata 2026, abayobozi batandukanye, baba abakiri mu nshingano n’abatakizirimo baganiriye ku ngamba zo kwihutisha iterambere ry’Intara y’Amajyaruguru aho bari mu cyumba cy’inama mberabyombi cy’Akarere ka Gicumbi.
Iyi nama nyunguranabitekerezo ku iterambere ry’intara yari igamije gusuzuma aho iterambere ry’Intara y’Amajyaruguru rigeze no gushyiraho ingamba zo kurushaho kurizamura ikaba yari ifite ingingo icyenda zari ku murongo w’ibyigwa arizo: Kurandura igwingira; Guca umwanda; Guca ubusinzi n’ibinyobwa bitujuje ubuziranenge; Gushaka abafatanyabikorwa mu iterambere; Kurangiza imishinga yatangiye; Kunoza imyubakire; Gushyira abana bose mu ishuri; Kubungabunga no kurengera ibidukikije; Raporo ku bikorwa byakozwe no kubazwa inshingano (Accountability).
Ni inama yari iyobowe na Guverineri w’Intara y’Amajyaruguru Mugabowagahunde Maurice aho mu ijambo rye ritangiza inama yagaragaje ko hari intambwe ishimishije imaze guterwa.
Yagize ati: “Intambwe imaze guterwa irashimishije kuko duhereye nko ku mutekano, uhagaze neza; Umusaruro w’ubuhinzi wariyongereye; Iterambere ry’imijyi na santere z’ubucuruzi ndetse n’ibikorwaremezo bikomeje kwiyongera.”
Guverineri yakomeje avuga ko hakiri imbogamizi zibangamiye imibereho y’abaturage, zisaba kongerwamo imbaraga n’ubufatanye bw’inzego zose kugira ngo zikemuke burundu. Bityo, abayitabiriye bakaba bagarutse ku shusho y’Intara mu bukungu n’imibereho y’abaturage, basesengura ibyagezweho ndetse bafata ingamba zihamye zigamije kwihutisha iterambere rirambye.
Guverineri Mugabowagahunde yashoje ashimangira ko hakenewe kwegera abaturage kurushaho, hakemurwa ibibazo byabo ku gihe, anasaba ubufatanye mu kurwanya umwanda, gukumira igwingira n’imirire mibi cyane cyane mu bana ndetse no guhangana n’ikibazo cy’abana bata ishuri (Dropout).
Abitabiriye inama bagejejweho ibiganiro byibanze ku ishyirwa mu bikorwa rya gahunda ya kabiri y’Igihugu y’Iterambere (NST2) ndetse n’ibimaze kugerwaho n’umushinga “Green Gicumbi”. nyuma hatangwa ibitekerezo byubaka biganisha ku ngamba zifatika zo kurushaho guteza imbere Intara y’Amajyaruguru no kuzamura imibereho myiza y’abayituye.
Iyi nama nyunguranabitekerezo yari yitabiriwe n’abantu bo mu nzego zitandukanye zirimo: Abayobozi mu nzego za Leta; Abahoze mu buyobozi bukuru bw’Igihugu, abahoze ari abayobozi b’Intara y’Amajyaruguru; Inzego z’umutekano; Abikorera; Abahagarariye amadini n’amatorero ndetse n’abafatanyabikorwa mu iterambere.
Inama yasojwe hafashwe imyanzuro igamije gushimangira ubufatanye mu ishyirwa mu bikorwa ry’ingamba zafatiwe hamwe mu rwego rwo kwihutisha iterambere rirambye ry’Intara y’Amajyaruguru.
Yanditswe na SETORA Janvier
