Umuyobozi w’Akarere ka Rubavu, Mulindwa Prosper, yatangaje ko hari bamwe mu baturage bo muri aka karere bagiye bashukwa n’umutwe w’iterabwoba wa FDLR bakagurisha amasambu yabo ngo bayitere inkunga, bibwira ko izafata igihugu mu gihe gito.
Ibi Meya Mulindwa yabigarutseho ku wa 16 Mata 2026 ubwo yakiraga Abanyarwanda batahutse bava muri Repubulika Iharanira Demokarasi ya Congo, bari barafashwe bugwate na FDLR.
Abatashye bagizwe n’abana 280; aAbagabo 18 n’abagore 105, binjiye mu Rwanda banyuze ku mupaka munini wa La Corniche uhuza Rubavu na Goma. Bahise bajyanwa mu nkambi y’agateganyo ya Nyarushishi mu Karere ka Rusizi.
Umuyobozi w’Akarere ka Rubavu, Mulindwa Prosper yabasabye kwirinda FDLR cyane ko hari abo yagiye ishuka bakagurisha imitungo yabo.
Ati: “Abantu (FDLR) mu maze iminsi muri kumwe bagiye bashuka Abanyarwanda bamwe na bamwe bakabumvira ngo bagiye kuza gutera u Rwanda barubohoze, bagurisha amasambu yabo bibashyira mu bukene kubera impuha n’inyigisho mbi.”
Yaberetse ko bakwiriye gufatanya n’abandi kubaka igihugu no kwirinda ibihuha bishobora gusenya.
Ati: “Muzirinde impuha murebe ubuyobozi kuko inzego zabwo zegerejwe umuturage, mukore mwiteze imbere kandi mwibuke kubwira abo muziranye n’abo mufitanye isano batarafata icyemezo cyo gutaha muzababwize ukuri, bave mu nyigisho mbi kuko bakizengurutswe n’abantu batifuza ko batahuka.”
Yakomeje avuga ko FDLR ibabuza gutaha ifite impamvu ibikora zigamije gusenya u Rwanda.
Ati: “Bariya bababuza gutaha baba bashaka inyungu zabo, bahora bifuza ko mugumana nabo bitwaza ko hari abaturage barinze bazatahana mu Rwanda, kandi muzababwire ibyo mugiye gusanga byose.”
Bamwe mu batahutse baganiriye na IGIHE bavuga ko bari babayeho mu buzima bugoye, ndetse bishimira kuba bageze kuri gakondo.
Niyonsenga Segasore w’imyaka 25 wavukiye muri Congo yagize ati “Ndishimye kubera ntashye, ababyeyi babanje gutaha bageze mu Rwanda batubwira ko ari amahoro, twari tubayeho mu bibazo, ugahinga ntusarure, ukaryama utazi ko buracya kubera intambara.”
“FDLR yaraje itema insina yangiza ibintu byose, abagore bajyaga mu mirima bagiye guhinga babasangayo bakabafata ku ngufu, bikaba ngombwa ko babaha imiti mu kwirinda ko basama cyangwa bakagira izindi ndwara banduzwa.”
Uwase Jeannette w’imyaka 18 yavuze ko “Njye navukiye muri Congo, ababyeyi banjye baza gutaha muri Giciye twaraburanye kubera intambara, ubuzima umuntu yabagaho bwari bugoranye, ariko ubu ndishimye kuko ngiye gushakisha ubuzima nkibeshaho, kuko hariya ntacyo wahingaga ngo ugisarure kubera FDLR.”
Aba Banyarwanda babaga mu nkambi y’agateganyo ya Goma, nyuma yo kuva mu bice bitandukanye babagamo mu Burasirazuba bwa RDC, aho bari baragizwe imbohe n’umutwe w’iterabwoba wa FDLR bakishyikiriza HCR kugira ngo ibafashe gutaha mu gihugu cyababyaye.
Iyo abahungutse bagiye gusubizwa mu buzima busanzwe bahabwa amafaranga y’ibanze yo kubafasha gutangira ubuzima, aho urengeje imyaka 18 ahabwa Amadolari y’Amerika 188, uri munsi yayo agahabwa 113$ ndetse buri wese agenerwa n’ibyo kurya by’ibanze bifite agaciro ka 40.800 Frw.
Abanyarwanda bakiriwe bavuye muri Repubulika Iharanira Demokarasi ya Congo, bahise bajyanwa i Nyarushishi. Ni inkuru muri karibumedia.rw, dukesha igihe.com
Karibumedia
