Muri RDC Ntibyoroshye

Umutwe wa Front pour la refondation de la nation (FRN), umutwe uyobowe na Joseph Kabila, wagaragaje kutemeranya no kongera manda y’ubutumwa bw’ingabo z’Umuryango w’Abibumbye muri Repubulika Iharanira Demokarasi ya Congo (MONUSCO), unenga kandi gahunda yo kuzohereza muri Kivu y’Amajyepfo mu rwego rwo gukurikirana iyubahirizwa ry’agahenge k’imirwano.

Ibi byagarutsweho nyuma y’inama yahuje Joseph Kabila na James Swan, uhagarariye Umunyamabanga Mukuru wa Loni muri RDC akaba n’umuyobozi wa MONUSCO.

Bertrand Bisimwa, umwe mu bayobozi ba FRN, yavuze ko uyu mutwe ubona ko MONUSCO yananiwe kugera ku nshingano zayo, bityo ko kongera igihe cy’ubutumwa bwayo atari cyo gisubizo. Icyokara FRN ntiyamaganye burundu ubufasha bwa tekiniki n’ibikoresho mu kugenzura agahenge.

Uyu mutwe kandi wagaragaje impungenge ku kohereza MONUSCO muri Kivu y’Amajyepfo, uvuga ko utabona impamvu yo kongera ibikorwa byayo muri ako gace.

Iyi myumvire itandukanye n’icyerekezo cy’Inama y’Umutekano ya Loni, kuko Icyemezo 2808 (2025) giteganya ko MONUSCO ishobora gushyigikira igenzura ry’agahenge muri Kivu y’Amajyepfo, mu gihe manda yayo yari yongerewe kugeza ku wa 20 Ukuboza 2026.

Kutumvikana kuri manda ya MONUSCO n’uruhare rwayo muri Kivu y’Amajyepfo bishobora kugira ingaruka ku mikoranire y’impande zirebwa n’ibiganiro by’amahoro muri RDC. Icyakora, icyemezo cya nyuma ku hazaza h’iyi mission kiri mu bubasha bw’Inama y’Umutekano ya Loni.

Karibumedia.rw