Mu rwego rwo kurwanya inzoga zitujuje ubuziranenge zirimo n’ibyuma ndetse ibiyobyabwenge byavumwe mu ruhame na Minisitiri w’uburinganire n’iterambere ry’umuryango kuko ngo ntacyo byamariye abantu uretse kubica.
Ni ubutumwa bwahawe abaturage bo mu murenge wa Muhoza mu karere ka Musanze nyuma y’umuganda rusange wakorewe ku mugenzi wa Rwebeya uherereye mu kagari ka Ruhengeri, umudugudu wa Kabaya mu rwego rwo kubungabunga amazi ava mu birunga harengerwa n’ibidukikije.
Nyuma y’uyu muganda rusange witabiriwe n’abantu b’ingeri zose (Abayobozi, ingabo na Polisi, itsinda rya Sober Generation, abahanzi n’abaturage muri rusange), aho Umuvugizi wa RIB Dr. Murangira B.Tierry yavuze ko kuba Leta y’u Rwanda yarafatanije n’abaturage guca ibyuma byagiriye akamaro benshi ndetse ngo n’ibyaha bikaba byaragabanutse cyane.
Yagize ati: “Nyuma yo guca ibyuma, ibikorwa bibi byinshi by’ubwomanzi, ibyaha n’amakimbirane mu miryango byaragabanutse ku buryo bugaragara. Ibyuma byatuzaniraga amafaranga, ni byo ariko bikongera bikayatwara kubera uburwayi bw’ababinyoye bajyaga kwivuza, bamwe bagapfa abandi bagahuma.”
Dr.Murangira yakomeje asaba abagifite ibyuma ko babizana ku neza aho kugira ngo bazabifatanwe kuko aribyo bibi.
Yagize ati: “Burya uwambaye ikirezi, ntamenya ko cyera koko!! U Rwanda rwacu ni rwiza, ni yo mpamvu twifuza u Rwanda ruzira icyuma, rukazira icyaha, turifuza urubyiruko ruri SOBER ku biyobyabwenge na SOBER ku mbugankoranyambaga kuko hari abazikoresha nabi zikabakururira ibyago byo kugwa mu byaha kandi zakagombye kubahahira ariko abazazikoresha nabi, ayo madorari bizarangira bayasize, aribwe n’abandi abayakoreye bari ahatari heza. Ni ukuba SOBER rero.”
Mu butumwa bwe, Guverineri w’Intara y’Amajyaruguru Mugabowagahunde Maurice yasabye abaturage kwitwararika mu bihe tugiye kwinjiramo by’imvura nyinshi kugira ngo batazahura n’ibibazo, ababigize kandi nabo bagatabarwa.
Yagize ati: “Icyo mbasaba ni ukwitegura by’ukuri imvura nyinshi igiye kuzagwa, mbasaba gusibura imigenda y’amazi, kuzirika ibisenge no gufata amazi yo ku nzu n’abakiri mu manegeka bakahava nk’uko tutahwemye kubibakangurira no kubagira inama kuko icya mbere ni amagara naho ibindi byo, urabikenera ukajya ku isoko cyane cyane twitwararika ku nkuba kuko nazo zishobora kudutwara abantu. Ikindi nabasaba ni ugutabarana igihe habaye ibyago runaka.”
Minisitiri w’uburinganire n’iterambere ry’umuryango, Uwimana Consolée yavuze ko umuryango ari wo shingiro ry’imbaga nyarwanda ariko yifitemo ibibazo by’abasambanya abana, abagwingira, abata ishuri n’abaterwa inda ari abangavu, bityo asaba buri wese gutanga amakuru ku bakora ayo mahano, abana batiga nabo bagasubizwa ku ishuri.”
Minisitiri Uwimana Consolée atanga ubutumwa
Minisitiri Uwimana yakomeje avuma inzoga zitujuje ubuziranenge n’izizwi nk’ibyuma avuga ko ntacyo zimaze ahubwo ko zisenya imiryango kandi umuryango mwiza ari ushoboye kandi utekanye uzira ibiyobyabwenge ahubwo ukaba SOBER.
Yagize ati: “Si ndi Pasitoro ngo nzisengere ariko ndazivumye kuko ntacyo zimariye abantu ahubwo zarabishe abandi barahuma. Ubundi umunyarwanda twifuza nitwe tumurera nk’ababyeyi, niyo mpamvu tugomba kugira umuco wo kuganiriza abana, tukabumva, icyo umwana asabye akagihabwa kibashije kuboneka ariko n’icyo utabonye, akumva ko utakimwimye gihari. Bityo, duharanire ko igihugu cyacu kizira ibiyobyabwenge.”
Mu gusoza Minisitiri Uwimana Consolée yasabye abantu bose kwita ku bana bo mu muhanda, asaba ko buri wese yabigira ibye, abo bana bakava mu muhanda.
Yasabye kandi abantu bose bageze igihe cyo gutora kandi babyemerewe kuzitabira amatora, biyamamaza cyane cyane urubyiruko n’abagore ariko n’abataziyamamaza, bakazayagiramo uruhare rutaziguye kugira ngo azagende neza.
Yanditswe na SETORA Janvier
