Arkiyepiskopi wa KIGALI, Nyiricyubahiro Antoine Cardinal KAMBANDA kuri uyu wa Kabiri tariki ya 04/08/2026 nibwo yayoboye igitambo cy’Ukaristiya yaturiye muri Paruwasi Cathédrale Saint Michel ho muri Arkidiyosezi ya KIGALI. Ni igitambo cyo gufungura ku mugaragaro Kongere mpuzamahanga ya SIGNIS “SIGNIS WORLD CONGRESS 2026”, iri kubera mu RWANDA muri Hotel Sainte Famille; Muri Arkidiyosezi ya KIGALI. Ni ku nshro yayo ya 8 kuva tariki ya 03_ 08/08/2026, ihurije hamwe abakora mu rwego rw’Itangazamakuru n’Itumanaho rya Kiliziya baturutse mu bihugu birenga 40 byo ku migabane 5 y’isi. Ikaba ari ku nshuro ya mbere ibereye muri AFURIKA.
Mu rurimi rw’igifaransa, ifite insanganyamatsi igira iti: “COMMUNICATION NUMÉRIQUE AU SERVICE DE L’HARMONIE CULTURELLE ET DU BIEN_ ÊTRE ENVIRONMENTAL”.
Mu butumwa yabagejejeho mu ijambo rye ry’ikaze yabagejejeho mbere ya saa 12h, Arkiyepiskopi yavuze ko iyi Kongere itanga amahirwe yo kongera kwibuka ubutumwa bw’Inama Nkuru ya Vatican II, bwahamagariraga abana ba Kiliziya bose gushyira hamwe imbaraga bifatanya mu gikorwa rusange cyo gukoresha neza itumanaho mu bikorwa bitandukanye by’ubutumwa bwa gikristu.
“Iyi Kongere iteraniye i Kigali mu Rwanda, ni kongere yo ku rwego rw’isi ikaba ibereye muri Afurika bwa mbere. Itanga amahirwe yo kongera kwibuka ubutumwa bw’Inama Nkuru ya Vatican II, bwahamagariraga abana ba Kiliziya bose gushyira hamwe imbaraga bifatanya nta gutindiganya mu gikorwa rusange cyo gukoresha neza itumanaho mu bikorwa bitandukanye by’ubutumwa bwa gikristu hakurikijwe ibihe n’imiterere y’ibikenewe”.
Inama Nkuru ya Vatican ya II yasabye ko hashyirwaho ibitangazamakuru bya Kiliziya Gatolika, hagashingwa ibigo bishinzwe itumanaho mu bihugu bitandukanye ndetse hakanatezwa imbere ubufatanye hagati yabyo binyuze mu mashyirahamwe y’abanyamwuga b’ibitangazamakuru Gatolika nka SIGNIS ihurije hamwe abantu benshi muri iki gihe. Ibi, ni byo inyandiko ya Inter Mirifica ivuga mu ngingo zayo zo: 13; 21 na 22.
yakomeje avuga ko muri rusange ibitangazamakuru by’itumanaho byahaye Kiliziya amahirwe mashya yo gusohoza ubutumwa bwayo bwo kwamamaza Inkuru Nziza ya Kiliziya ku isi yose. Binyuze mu ikoreshwa neza ry’ibi bitangazamakuru, Kiliziya igira uruhare mu guteza imbere imibereho myiza ishingiye ku mahoro, ubuvandimwe, iterambere rirambye, kubahiriza agaciro ka muntu no gukwirakwiza indangagaciro za gikristu.
Kongere mpuzamahanaga ya SIGNIS itanga amahirwe akomeye yo gusuzuma intambwe Kiliziya imaze gutera mu gukoresha itumanaho mu iyogezabutumwa no kumenya ahakenewe kongerwa imbaraga kugira ngo ubwo butumwa burusheho gutanga umusaruro.
Yakomeje avuga kandi ko ari umwanya wo gutekereza ku ngaruka zishobora guterwa n’itangazamakuru risanzwe n’imbuga nkoranyambaga igihe bikoreshejwe nabi, ndetse no ku byago bishobora guteza umuryango mugari (“Society”).
Iyi Kongere ikurikiye itangazwa ry’urwandiko rwa Nyirubutungane Papa Leon wa 14 rwitwa ‘Magnifica Humanitas’, rushimangira akamaro ko kurinda agaciro n’umwihariko bya muntu muri iki gihe cy’ubwenge buhangano (“Artificial Intelligence”).
Arkiyepiskopi, yongeyeho ko kuba intumwa zirenga 300 ziteraniye hano mu RWANDA bitanga ubutumwa bukomeye. Yavuze ko itumanaho nyaryo rishingiye ku bwenge no ku mutima bya muntu. N’ubwo itumanaho rifite uruhare rukomeye ariko ko rikwiye gukomeza kuba igikoresho kigomba gukorera inyungu z’ikiremwamuntu no guteza imbere imibereho myiza yacyo. Bityo, iyi Kongere ikaba itanga amahirwe yo kurushaho kuzirikana ku nyigisho za Nyirubutungane Papa no gushakisha uburyo Kiliziya n’abantu bose bafite umutima mwiza bashobora gukoresha neza kandi mu buryo buboneye ubwenge buhangano (“Artificial Intelligence”) n’irindi koranabuhanga rigezweho, batabangamiye agaciro k’umuntu cyangwa indangagaciro za Gikristu.
Kubera ko ari Kongere mpuzamahanga ya mbere ya SIGNIS ibereye muri AFURIKA, Cardinal KAMBANDA yavuze ko iyi nama inatanga umwanya kugira ngo uyu mugabane usangize isi ubunararibonye bwawo mu guteza imbere itangazamakuru Gatolika rikozwe kinyamwuga ndetse no guhangana n’ikoreshwa nabi ry’itangazamakuru risanzwe n’imbuga nkoranyambaga bikwirakwiza amacakubiri; Urwango n’ibinyoma.
Yatanze urugero rw’uko u RWANDA rwakuye amasomo akomeye mu mateka ababaje ya genocide yakorewe Abatutsi mu mwaka 1994. Avuga ko bibabaje kuba ibitangazamakuru byarakoreshejwe nabi mu gukaza amacakubiri n’iterabwoba, bikagira uruhare mu koroshya ishyirwa mu bikorwa rya genocide kugeza n’ubwo ibitangazamakuru ubwabyo byabaye nk’abafatanyacyaha.
Kuva icyo gihe, ibitangazamakuru byabaye ibikoresho by’ubumwe; Ubwiyunge n’amahoro. Kubera amasomo yavanywe muri ayo mateka, ubu akoreshwa mu itangazamakuru mu gukiza ibikomere no gusana ibyangijwe, hatezwa imbere ubumwe; Ubwiyunge n’amahoro.
Tubibutse ko uyu kandi, nyuma ya saa sita ku isaha ya 18h00’ ari bwo Arkiyepiskopi wa KIGALI, Nyiricyubahiro Antoine Cardinal KAMBANDA, yayoboye igitambo cy’Ukaristiya cyo gufungura ku mugaragaro iyi Kongere mpuzamahanga ya SIGNIS “SIGNIS WORLD CONGRESS 2026”.
Mu butumwa yatangiye muri iki gitambo cy’Ukaristiya yaturiye muri Paruwasi Cathédrale Saint Michel uyu munsi, Arkiyepiskopi yavuze ko isi igeze mu gihe kigizwe n’iterambere rikataje ry’ikoranabuhanga mu rwego rw’itumanaho, bityo ko Kiliziya ifite amahirwe akomeye mu gusohoza ubutumwa bwayo bwo kwamamaza Inkuru Nziza ku isi ya none. Kiliziya ifite ubutumwa bw’umukiro bagomba kugeza ku bantu bose, no kubumenyekanisha ku isi yose.
Yasobanuye ko umuntu yaremewe gukunda no gukundwa, ko iyo abuze urukundo asenyuka kandi agatakaza icyerekezo cy’ubuzima bwe.
Yavuze ko muri iki gihe abantu benshi bafite inzara n’inyota by’urukundo n’ibyishimo, gusa ariko akenshi ugasanga babishakira aho bitari. Babishakira mu bukungu bw’iby’isi; Mu cyubahiro n’ubutegetsi; Mu kwinezeza no mu byifuzo by’umubiri ndetse no mu rukundo rushingiye ku nyungu za muntu. Nyamara ariko umutima w’umuntu wo uhora ufite inyota y’urukundo nyakuri, ari rwo rukundo rw’Imana.
Aha yatanze urugero rwa Mutagatifu Agustini wabivuzeho, aho yavuze ko umutima w’umuntu udashobora kubona amahoro nyakuri utabonye urukundo rw’Imana. Avuga ko ubu ari bwo butumwa bwihutirwa bugomba kugezwa ku bantu bose.
Arkiyepiskopi wa KIGALI, Nyiricyubahiro Antoine Cardinal KAMBANDA yagaragaje uruhare rukomeye rw’Abamisiyoneri mu kwamamaza Inkuru Nziza ku isi yose kandi ntabushobozi buhanitse bari bafite mu by’itumanaho nk’ubu; Yibutsa ko amahirwe ariho ubu akwiye kubyazwa umusaruro.
“Abakururambere bacu b’Abamisiyoneri bakoze ibishoboka byose kugira ngo bageze inkuru nziza ku migabane yose y’isi: Muri ASIA; Muri AMERICA no muri AFRICA. N’ubwo babikoze bafite uburyo buke bw’itumanaho ariko babigezeho kubera ukwemera gukomeye n’urukundo rwinshi bari bafite, bashobora kwamamaza Kristu no kwamamaza Inkuru Nziza y’umukiro ku bantu benshi. Uyu munsi twebwe, ijwi ryacu rishobora kugera ku isi yose mu masegonda make. Ibi bikaba ari amahirwe akomeye cyane twahawe; Ni ibimenyetso y’ibihe turimo biduhamagarira kongera imbaraga mu iyogezabutumwa”.
Gusa yavuze ko n’ubwo bimeze gutya ariko bidahagije. Yavuze ko n’ubwo abantu bafite uburyo bwihuse bw’itumanaho byonyine bidahagije, kugira ngo bamamaze Inkuru Nziza ku isi yose uko bikwiye. Mbere ya byose na bo ubwabo bagomba guhinduka no kwakira urukundo rw’Imana mu mitima yabo. Bagomba kwemera urukundo rw’Imana no kurubamo, kugira ngo bashobore guhindukira no kurebana isi amaso ya Yezu Kristu, bakabona abantu nk’uko Kristu ababona, bakareba ubuzima nk’uko abubona, bagakunda kandi bagakorera abavandimwe babo nk’uko Kristu abakunda. Abantu bose bahamagariwe kubona ibintu nk’uko Kristu abibona no kurebana ubuzima amaso y’ukwemera kugira ngo babe abahamya b’ukuri b’Inkuru Nziza muri iyi si.
SIGNIS ni ihuriro rihuza abakora mu rwego rw’Itangazamakuru n’Itumanaho bya Kiliziya.
Izi nzego, zihera: Ku rwego rw’igihugu; Inzego zihuza akarere k’ubutumwa mu rwego rw’Abepiskopi, bikagera ku rwego rw’umugabane ndetse no ku rwego rw’isi. Abagize izi nzego ku isonga haza abayobozi bakuru mu nzego zishinzwe itumanaho rya Kiliziya.
Ku rwego rw’isi, habanza urwego rukuru rw’i Vatican rurimo abayobozi mu rwego rushinzwe Itangazamakuru n’Itumanaho bya Kiliziya, ukamanuka kugera ku nzego za Kiliziya zindi muri diyosezi. Uretse izi nzego z’itumanaho zigize ubutumwa muri Kiliziya, hiyongeraho n’ibitangazamakuru bya Kiliziya ubwabyo. Aho urugero nko mu RWANDA hari: Pacis TV; Radio Mariya RWANDA; Radio Maria KIBEHO na KINYAMATEKA.
Ikindi kiciro kigizwe n’inararibonye n’abashakashatsi bari muri za kaminuza, aho usanga uko Kiliziya iba yashyizeho itangazamakuru ariko nako inashyiraho za kaminuza ryigisha itangazamakuru ry’umwuga. Hano mu RWANDA twavugamo nka kaminuza Gatolika ya KABGAYI (ICK), iherereye muri Diyosezi ya KABGAYI ifite ishami ry’Itangazamakuru n’Itumanaho.
Aha muri za kaminuza hakaba hanabarizwamo abashakashatsi; Abarimu bakora muri uru rwego rw’itangazamakuru n’itumanaho n’abatera inkunga urwego rw’Itangazamakuru n’iItumanaho bya Kiliziya.
Abitabiriye inama mpuzamahanga ya SIGNIS iri kubera i Kigali mu Rwanda kuva tariki ya 03 kugeza ku ya 08 Kanama 2026, kuri uyu munsi wa gatatu w’iyo nama, basuye Urwibutso rwa Jenoside yakorewe Abatutsi rwa Kigali ruri ku Gisozi, bunamira inzirakarengane ziruruhukiyemo. Banasobanuriwe amateka yagejeje kuri Jenoside Yakorewe Abatutsi mu 1994.
Ni inkuru muri Karibumedia.rw dukesha ArchKigali_ Media
