Ibirori byo kwizihiza umunsi mukuru wo Kwibohora ku nshuro ya 32, ku rwego rw’Intara y’Amajyaruguru byabereye mu Kagari ka Rutabo; Umurenge wa Mugunga mu Karere ka Gakenke, ahatashywe ku mugaragaro inzu 6, buri nzu irimo ebyiri, zigenewe imiryango 12 yiganjemo abasenyewe n’ibiza.
Imirimo yo kubaka izo nzu yakozwe binyuze mu bikorwa by’ubufatanye bw’Ingabo na Polisi bigamije guteza imbere imibereho myiza y’abaturage (DSCOP 2026).
Abahawe inzu bashimiye ubuyobozi bukuru bw’Igihugu budahwema kubatekerezaho, babwizeza kuzazifata neza zikazagirira akamaro n’abandi bazabakomokaho.
Costazia Akingeneye wo mu Murenge wa Mugunga, ni umwe mu bagenerwabikorwa bahawe inzu, avuga ko yagwiriwe n’ibiza byamusenyeye inzu, bikamutwarira imirima n’amasambu, agasigara ahagaze amara masa n’umuryango w’abantu batanu.
Ati: “Tubaho nabi mu buzima bubi, tutagira icyo kurya; Kuryamaho, tuba ku gasozi. Leta y’Ubumwe yo kagira Imana mu Rwanda, Nyakubahwa Paul Kagame yohereje abayobozi ngo baze kureba ibyo bibazo byabaye iwacu, biba ngombwa ko badukura aho hantu bajya kudukodeshereza inzu, tuzimazemo imyaka ibiri.”
Yungamo ati “Muri iyo myaka ibiri twabayeho neza kubera kudutangira amafaranga y’ubukode. Imyaka ibiri aho ishiriye twumva inkuru nziza ivuga ko bagiye kutwubakira inzu, barazubatse ziruzura. Ni inzu nziza cyane, zirimo umuriro; Ibigega by’amazi; Ibiryamirwa; Ibyo kurya; Aho kubika ibyo kurya, mbese tubayeho neza mu buzima. Nyakubahwa Paul Kagame adukuye ahantu hakomeye. Turi imiryango 12 yubakiwe, n’abandi basigaye inyuma nizeye ko barimo kubazirikana.”
Muri rusange abubakiwe barashimira ubwitange n’umurava by’Ingabo na Polisi by’Igihugu, babafashije kububakira inzu hamwe n’abaturage bababaye hafi mu mirimo yose yakozwe kugira ngo zigere aho bazitaha.
Babikuye ku mutima kandi abasenyewe n’ibiza bashimiye Perezida Paul Kagame udahwema kubazirikana no kubashakira ibyiza bamwizeza kuzafata neza inzu bahawe.
Akingeneye ati: “Izi nzu mureba zirakomeye ntaho zizajya, tuzaziraga abuzukuru n’abuzukuruza, ku bw’imbaraga za Nyakubahwa Paul Kagame uhora atuzirikana uko buceye n’uko bwije, aduhozaho umutima, Imana izamuhe umugisha, abantu twahuye n’ibiza turamushima ku buryo bukomeye cyane. Izi nzu tuzazifata neza, tuzazigirira isuku umunota ku munota, tuzazigira igikorwa cyiza cya Leta, ku buryo azajya yohereza abantu bo kudusura bagasanga tubayeho neza.”
Perezida w’Urukiko rw’Ikirenga, Mukantaganzwa Domitilla ari kumwe n’Umugaba Mukuru w’Ingabo z’u Rwanda (RDF), Gen. Mubaraka Muganga; Abahagarariye Polisi y’u Rwanda ndetse n’ubuyobozi bw’Intara y’Amajyaruguru bifatanyije n’abaturage kwizihiza Umunsi Mukuru wo Kwibohora ku nshuro ya 32.
Muri ibi birori byabereye mu Karere ka Gakenke, hatashywe ibikorwaremezo byubatswe n’Ingabo z’u Rwanda ku bufatanye na Polisi y’Igihugu aho abaturage bashyikirijwe inzu zubakiwe imiryango itishoboye 12; Ibiraro n’imihanda byubatswe mu mwaka wa 2025/ 2026 n’ibindi.
Perezida w’Urukiko rw’Ikirenga, Mukantaganzwa Domitilla, yashimiye Ingabo z’u Rwanda na Polisi y’Igihugu ku bikorwa ngarukamwaka bagiramo uruhare, bifasha abaturage mu mibereho yabo ya buri munsi.
Yavuze ko u Rwanda rwizihiza kwibohora ku nshuro ya 32, hazirikanwa ubutwari bwaranze Inkotanyi mu kubohora Igihugu no guhagarika Jenoside yakorewe Abatutsi, asaba abaturage gukomeza gusigasira ubumwe bw’Abanyarwanda bimakaza ubufatanye mu rugendo rwo kubaka iterambere rirambye.
Yanditswe na Nkurunziza Bonaventure.
