Kuri uyu wa 23/05/2026, ubwo hizihizwaga umunsi Mukuru wa Mutagatifu Karoli Lwanga mu ishuri ry’imyuga n’ubumenyingiro rya Diyosezi ya Ruhengeri “ETEFOP TSS” yaragijwe.
Abarimu basabwe kwitangira umurimo bagendeye ku rugero rwa Yozefu Mutagatifu, urugero mu bakozi.
Ni ibirori byabimburiwe n’igitambo cy’Ukaristiya cyatuwe n’Umushumba wa Diyosezi ya Ruhengeri Nyiricyubahiro Visenti Harolimana ari nawe nyir’urugo akikijwe n’abapadiri batandukanye bari baje kwifatanya n’abakorera ubutumwa mu ishuri rya ETEFOP kwizihiza umunsi mukuru wa Mutagatifu Karoli Lwanga. Muri iki gitambo cy’Ukaristiya, Umwepiskopi yatanze isakaramentu ry’ugukomezwa.
Mu ijambo ry’ikaze ryavuzwe n’Umuyobozi w’iri shuri Padiri Remedi Didier Dushyirehamwe yashimiye Nyiricyubahiro Musenyeri ku bikorwa by’indashyikirwa bitandukanye amaze kugeza kuri iri shuri rikaba ribaye ubukombe.
Yagize ati: “Turabashimira Nyiricyubahiro Musenyeri ku bikorwa bitandukanye mumaze kutugezaho muri iri shuri kuko byatumye natwe dufata icyerekezo cyo kwimakaza ubumenyingiro bufite ireme, umuco n’ubunyangamugayo no kwiteza imbere.Ni ishuri rimaze kuba ubukombe kuko hari n’abarenga imipaka bakaza kwiga hano kandi batwara impamba yuzuye kuko twihaye gahunda yo kurera umwana ushoboye kandi ushobotse mu ntero igira iti’ Ndera neza, Nkure neza, Nkore neza.'”
Umunyeshuri uhagarariye abandi Akimana Valentine yashimiye ubuyobozi bwa Diyosezi ya Ruhengeri budahwema kubashakira ibikenerwa byose ngo bige neza, ashimira abarimu babigisha n’ababyeyi babo.
Yagize ati: “Nk’abanyeshuri, turashima ineza n’urukundo Diyosezi itanga, turabashimira ibibuga baduhaye bituma twidagadura no gukora ibinogera Imana n’abantu, turashimira kandi ko twabonye aho gusengera (Chapelle) kandi ikaba yarahawe umugisha na Nyiricyubahiro Musenyeri kuwa 30/04/2024. Ikindi twishimira nuko n’isuku ari yose aho turara n’aho turira.”
Akimana Valentine yashoje atanga n’ibyifuzo aho yagize ati: “Nyiricyubahiro Musenyeri, turifuza ko abiga imyuga bajya boroherezwa bakimenyereza umwuga mu bikorwa bya Diyosezi nk’ababaji bakajya bakorera sitaje muri Economat Général mu gihe abiga ubutetsi bakwimenyereza muri Hôtel Fatima cyangwa se Centre Pastoral Notre Dame de Fatima.”
Mwarimu uhagarariye abandi Habimana Marc Vivien yavuze ko gukorera mu nyubako nziza byatumye batanga ubumenyi buhamye, bityo ashimira abafatanyabikorwa bagira uruhare mu iterambere ry’ishuri.
Yagize ati: “Intego yacu ni Ndera neza, Nkure neza, Nkore neza!! Hano muri ETEFOP turera umwana ushoboye kandi ushobotse kandi byose tubikesha inyubako nziza dukoreramo kuko zujuje ibisabwa byose kandi byose tubikesha Diyosezi yacu ya Ruhengeri n’abafatanyabikorwa bagira uruhare mu iterambere ry’ishuri.”
Habimana yakomeje atanga n’ibyifuzo birimo no kongererwa imishahara aho yagize ati: “Kugira ngo tunoze ubumenyi turifuza imodoka zo kwigishirizaho, kongera imashini zo mu bubaji kandi bigahuzwa n’ibikoresho mpuzamahanga, imishahara ikajyana n’impamyabushobozi no kutwongerera amahugurwa.”
Byayesu Etienne ni Perezida w’ababyeyi wavuze ko nta mwana ugomba gucikanwa ko n’uwacikishirije amashuri agomba guhabwa amasomo y’igihe gito (ShortCourse).
Yagize ati: “Tugiye kunoza ingamba nshya zo gukomeza kugira uruhare mu burezi bw’abana kandi tukiyemeza ko nta mwana ugomba gucikanwa mu burezi cyane cyane abacikishirije amashuri bagahabwa amasomo y’igihe gito (Shortcourse).”
Byayesu yakomeje avuga ingamba bafite n’ibyifuzo byabo aho yagize ati: “Turifuza kongera ibibuga bya basketball na volleyball kugira ngo abana bose babashe kujya bidagadura bazane n’ibikombe byinshi. Gusa tunarifuza ko Diyosezi yadufasha abana bakajya bakorera stage mu bikorwa byayo kandi bakagabanya ikiguzi ku babyeyi kuko ahandi dutanga ibihumbi ijana (100.000 frw) ndetse turifuza ko na ETEFOP yaba Kaminuza y’imyuga.”
Ubuyobozi bwite bwa Leta bwari buhagarariwe n’Umunyamabanga nshingwabikorwa w’umurenge wa Musanze, Twizerimana Clément washimiye ubuyobozi bwa Diyosezi kubera ibyiza ishuri rimaze kugeraho.
Yagize ati: “Ubuyobozi bwite bwa Leta burashimira ubuyobozi bw’ishuri by’umwihariko Nyiricyubahiro Musenyeri ibikorwa by’indashyikirwa ishuri ryagezeho mu burezi muri rusange, inyubako nziza, impano nyinshi mwatugaragarije, Siporo no kuba mwarahagarariye intara mu mikino inyuranye. Muri ba Rutavugwa ibihimbo kuko musanganywe imihigo, kurya mucurwa n’inyundo ziramye, mubaye ubukombe n’ingangare y’isata yasa abahizi ku ruhando mpuzamahanga.”
Twizerimana yakomeje asaba abanyeshuri gusigasira ubuzima aho yagize ati ” Banyeshuri namwe mukomeze gusigasira ubuzima nk’igishoro cy’ubu n’ejo hazaza, umuco wo guhiganwa, ikinyabupfura, ubunyangamugayo no kwihangana, mube abanyabigwi mu nkingi zinyuranye mwirinda ibiyobyabwenge, inda ziterwa abangavu no gusambanya abana, abahawe amasakaramentu, mukomeze gukura munogeye Imana n’abantu musigasira ubumwe bw’abanyarwanda kandi nk’uko ishuri ryabasize rikaba rikibasiga, mugomba kuzavana hano mufite umuhigo wo kwinogereza.”
Gitufu Twizerimana yashoje ashimangira gukomeza ubufatanye na Kiliziya mu gutanga uburere n’ubumenyi aho yagize ati” Ababyeyi tuzakomeza gufatanya tujyana abana ku shuri no kubahiriza ibisabwa kuko nta mubyeyi wakonsa adafashwe neza, dufatanye kunoza imibanire yacu ngo abana bakure neza cyane ko gusaba ari nko gusenga kandi mwasabye nk’abasenga n’ubusabe bwageze mu biganza bigaba kuko dushagaye umushumba udasaba uwo yimye. Nawe rero ntiyakwima uwamuhaye. Twebwe nk’Ubuyobozi, bibaye mu gihe dusabwa kwirinda icyorezo cya Ebola,twubahirize inama tugirwa dushima ubufatanye bwa Leta na Kiliziya, twitabira igihe cyose mwadutumiye no gusobanurira abatitabira ubutumire igihombo bagira kandi bacyiteye.”
Nyiricyubahiro Musenyeri Harolimana Vincent, Umushumba wa Diyosezi ya Ruhengeri yavuze ko ishuri ry’imyuga n’ubumenyingiro rya ETEFOP.TSS rigamije kurera no gutoza abanyamwuga babishoboye.
Yagize ati: “Muri ETEFOP TSS ni ahantu hagomba kumvikanira kurusha ahandi agaciro k’umurimo unoze ufasha uwakoze kwiteza imbere, agateza imbere umuryango, Kiliziya n’igihugu muri rusange. Bikaba bijyanye rero n’imyumvire ya Kiliziya ku bijyanye n’umurimo nk’uko mubizi Imana niyo yaremye ibiriho nk’uko tubisanga mu gitabo cy’intangiriro umutwe wa 1: igice cya 1. Irema umuntu yamuhaye n’inshingano, imwe muri zo nshingano ni ukugira isi nziza binyuze mu murimo unoze.”
Nyiricyubahiro Musenyeri Harolimana yakomeje asaba abari aho bose kwitangira umurimo bagendeye ku rugero rwa Yozefu Mutagatifu.
Yagize ati: “Mu gihe mukora umurimo, mugomba gufatira kuri Yozefu Mutagatifu, Umugabo w’intungane n’inyangamugayo waranzwe no kwiyoroshya, ukunda umurimo no kwita ku muryango we. Ndabashishikariza mwese gukorana umurava, urukundo n’ubwitange, kwirinda ubunebwe kandi bikagendana no kubungabunga ibyo Imana yaremye no guharanira gukora ibikorwa byiza byubaka isi nziza ibereye abayituye.”
Mu gusoza Nyiricyubahiro Musenyeri Harolimana yagize icyo asezeranya ishuri, abanyeshuri, ababyeyi ndetse n’ubuyobozi bwite bwa Leta aho mu nteruro imwe yagize ati: “Sinasubiza ikibazo ku kindi ariko hari icyo nabasezeranya.Icyo mbasezeranya nuko dushingiye ku bufatanye bw’abantu bose bafite uruhare muri iri shuri, buri kibazo kizabonerwa igisubizo mu gihe gikwiye.”
Ishuri rya ETEFOP ryaragijwe Mutagatifu Karoli Lwanga ryatangiye mu 2009, ritangirana abanyeshuri 22, ubu rikaba rifite abagera ku 1.148 harimo abo hasi 947 n’163 biga hejuru rikaba rifite amashami 9 atandukanye.
Yanditswe na SETORA Janvier.
