Karibumedia mucyo twise Karibu Walk “Ka. Wa”, ku munsi w’umurimo 01/05/2026 twabagereye mu karere ka BURERA mu mirenge bita iy’amakoro “Gahunga; Rugarama na Cyanika”. Twaganirije abaturage baho, badutangariza ko hari abantu bafite imitungo: Bataguze; Batarazwe/ Batazunguye n’ababyeyi kandi batahaweho impano mu buryo bumwe cyangwa ubundi, bityo bakibaza ukuntu umuntu atunga ibitari ibye. Twabyise “Umugambi mubisha wa NDUMUJURA” ariko havugwa n’umuco mubi wo guhishirana ufatwa nka karande.
Ku itariki ya 16/04/2026 mu buhamya bwatanzwe, hari ibyakomojweho n’uhagarariye abacitse ku icumu rya jenoside yakorewe abatutsi 1994 mu karere ka BURERA. Ubwo hashingurwaga mu cyubahiro imibiri ibiri, ni mu rwibutso rwa Rugarama ahitwa ku Maya haruhukiye indi mibiri y’abazize Jenoside yakorewe Abatutsi mu mwaka w’1994. Ni imibiri yabonywe mu murenge wa Cyanika nyuma y’imyaka 32, bikaba byaravuzwe ko hari indi mibiri itaraboneka y’abatutsi bakurwaga hirya no hino bakicirwa ahari inkambi y’abasirikari mu murenge wa Rugarama ahitwa ku “Maya”. Aha hari mu isambu ya Leta, none ngo abantu bayibarujeho.
Ku Maya hahoze hitwa Kurwara, hari Poste de Commandement “PC”, niho Major MUVUNYI Tharcisse bitaga “Gafuni” yarafite ibirindiro mu cyari akarere k’imirwano ka Butaro. Yahiciye abantu benshi, barimo Abatutsi bahungaga ibitero by’interahamwe; Haguye n’izindi nzirakarengane, bazita ibyitso by’inkotanyi. Abenshi bafatwaga n’umutwe w’abaturage uzwi nk’abakenze bari bakuriwe n’uwitwa MAGEGA, uyu mutwe ukaba wari ufite icyicaro mu cyahoze ari Komine NKUMBA mu Gahunga.
Muri iyi nkambi ya gisirikare, Karibumedia.rw twabwiwe ko hari ubwumishirizo bw’ibireti “Inzu bitaga séchoir, abaturage bahita (ku Isashwara)”. Mu mwaka w’i 2000 iyi nzu yagurishijwe mu buryo budasobanutse, igurishwa itorero ry’Abangirikani mu Rwanda “EAR Diocèse ya Shyira”. Ubu iyo nzu ni Urusengero, ikikijwe n’imirima ihingwa n’abantu bitazwi uburyo bayibonye “Ntibisobanutse” kandi bayibarujeho. Ntibisobanutse kuko wari umutungo wa Leta.
Major MUVUNYI Tharcisse alias Gafuni, inkoramaraso ku rwego rwo hejuru
Kuri iriya Poste de Commandement “P.C”, bivugwa ko hagambaniwe n’ubuyobozi bw’icyari Akarere ka BUKAMBA mu rwego rwo gusibanganya ibimenyetso. Hari abaturage cyangwa abayobozi bari barahawe intwaro “imbunda”, aba bafatanije na Major MUVUNYI gukora ubwicanyi mu cyiswe Auto Défense Civile “A.D.C”. Gafuni yahabaye Jenoside itaratangira za 1991_ 1992, bahisemo kuhatuza kugira ngo ibyaha byakozwe bisibangane ndetse binibagirane. Dore ko bariya baturage ari nabo bahise binjira mu nzego z’ibanze intambara ikirangira, ni abantu batinywaga n’abandi baturage kuva kera kuko ni nabo bari abayobozi ba za barrières zariho icyo gihe ndetse hakaba na wa muco wo guhishirana no kwanga kwiteranya.
Karibumedia, tumaze igihe dukurikirana ikibazo cy’abigabije imitungo ya Leta bakayibaruzaho mu buryo bumwe cyangwa ubundi. Mu byo twabonye cyangwa twabwiwe harimo:
. Mu murenge wa Gahunga, ni inzu2 zubatswe ku nkunga ya PGRB ahagana mu mwaka w’1998 ndetse n’abaturage bakoze umuganda. Imwe ni ibagiro, indi ni ikigega gihunika imbuto z’ibirayi ;
. Mu murenge wa Rugarama ni ya nzu yagizwe urusengero n’isambu, byose uko twabivuze haruguru;
. Mu murenge wa Cyanika, ni isambu nini yahawe itorero ngo bubakemo urusengero mu rwego rw’isanamitima. Ukuriye itorero aherutse kuyigurisha kuko ibyemezo n’itorero ariwe byari bibaruyeho.
Umwe mu bavuzweho ko atunze imitungo itariye, yatumyeho umunyamaku ko nakomeza kumutunga agatoki azabizira ariko kuri twe ntacyo bidutwaye kuko turabimenyereye ko utunga itoroshi ahantu hari umwijima ibikoko bikihinda. Ni uko tubifata kandi baciye umugani ko “Uvuga ibigoramye imihoro ikarakara”.
Aba bantu batarashirwa ahagaragara batunze byinshi bataruhiye turakomeza kubikurikirana kuko si biriya gusa bitagira inkomoko, bavugwaho n’indi mitungo itari iyabo babonye mu buryo bw’uburiganya. Inzego zitandukanye, harimo n’Umuvunyi mukuru bafite umukoro wo kubikurikirana mu rwego two kurwanya IYEZANDONKE muri wa mugambi mubisha Karibumedia twabatije NDUMUJURA. Twe nk’itangazamakuru igihe n’iki ngo twegere abaturage/ rubanda, tubabaze kandi tubafashe hagaragare ukuri.
Tugarutse hariya hantu Major MUVUNYI Tharcisse alias Gafuni yabaga, bivugwa ko hari imibiri myinshi y’abantu yahiciye mu 1991_ 1992. Uretse no kuba yarakurikiranyweho icyaha cya Jenoside yakorewe Abatutsi 1994, icyaha yakoze ubwo yayoboraga ishuri rya gisirikare ESO/ Butare yakabaye n’ubundi yararezwe gukora ibyaha by’intambara kuko avugwaho kwica abari bafite uburwayi bwo mu mutwe benshi nk’uwitwa SEBAHASHYI n’abandi ndetse no kwica abafatirwaga ku rugamba kandi bose yabashinguraga hariya. Gusa twabwiwe ko aho yabashinguraga, n’ubundi hari igice cyaho cyigeze kuba irimbi rusange rya Komini NKUMBA. Birakenewe rero ko hamenyekana igice yashizemo imibiri y’izo nzirakarengane zindi.
Harya ngo uwicishije inkware ibuye ahora amanitse ukwaha?
Uyu munsi baratuma ku munyamakuru wa Karibumedia ngo nakomeza kuzura akaboze azabibona, ahubwo bazabibone aribo. Wasanga bifuza indi ntambara ngo bahitane uwabatunze agatoki, rimwe na rimwe niko bigenda kuko birazwi ko ari ba Rutemayeze na ba Rusahuriramunduru. Batunze ibyo batavunikiye; Batahaweho umurage n’ababyeyi cyangwa indi mpano yo mu buryo bwiza. Twongere tubabaze ngo bimwe mu byo mutunze mwabikuye he? Kandi tubabwire ngo musubize ibyibano ndetse tubasabe kureka kwikoma itangazamakuru n’abatanga ibitekerezo byubaka.
Nyuma y’imyaka 32 mu gikorwa cyo gushingura iriya mibiri, byagarutsweho ko umuntu wese waba uzi cyangwa akeka hashinguye abantu mu buryo butazwi ko yabivuga kandi ko ntawazira ko yatanze amakuru ashaka gufasha abantu n’inzego kumenya ukuri kw’ahari bene iyo mibiri ngo ishyingurwe mu cyubahiro. Governor Mugabowagahunde Maurice, yabisabye abaturage agira ati: “Mutinyuke mugaragaze ukuri ntawe uzazira ko yavugishije ukuri kandi ukuri guca mu ziko ntigushye.”
Umugambi mubisha wa NDUMUJURA, uvugwa muri karibumedia.rw waje ute cyangwa wiswe utyo kubera iki?
NDUMUJURA ni agasha n’umwihariko bya Karibumedia, n’igitekerezo cyaje mu buryo bugamije kugaragaza no guca intege abasahura n’abigwizaho ibya rubanda, aho cyatekerejwe bimaze kugaragara ko hari abantu badaterwa ipfunwe no kwiba ndetse aba bajura bakagerageza no kwerekana ko ibyo bakora ari byiza kandi ko ari ibisanzwe. Uretse ubujura; Kwibaruzaho no kwigwizaho, muri byo dukunze kugaruka k’Urunguze “Banque Lambert”; Kwiba no kunyereza imisoro ya Leta n’ibindi…
Twagiye dutanga ingero nyinshi zifatika kuri NDUMUJURA, aho usanga umuyobozi w’ikigo cy’ishuri runaka yanditse BABYEYI maze agasaba ko abana 800 batangirana amasuka kandi ikigo kitigisha ubuhinzi ndetse ugasanga nta n’isambu kigira, yewe n’ubusitani ari hafi ya ntabwo. Umwaka wa mbere asaba amasuka; Umwaka wa kabiri akayasaba, bityo bityo. Dufatiye urugero kuri uyu muyobozi w’ikigo cy’ishuri usaba ibi byose “Amasuka; Imyeyo; Imikoropesho; Impapuro n’ibindi…”, nyuma y’ukwezi uramutse ugiye kubimubaza ntiyabikwereka kuko abisubiza aho ababyeyi babikuye ku isoko “k’umucuruzi”.
Agasha muri iyi nkuru “Umugambi mubisha wa “NDUMUJURA”, bahishe imitungo bibye kandi biyitiriye; Bahishira byinshi mu byaha byakozwe n’ubu bigikorwa, bo ubwabo barihishe ndetse bahishira n’abandi bagize uruhare mu bwicanyi bwakozwe na Gafuni 1992 kuko yafatanije nabo nk’uko twabivuze haruguru ko bari barahawe intwaro “imbunda”.
Aba baturage bihishe mu nzego z’ibanze, bahisha ahashinguye imibiri y’abantu “Abatutsi bahungaga ibitero by’interahamwe; Ingabo zafatirwaga k’urugamba n’abo bitaga ibyitso by’inkotanyi kuko nibo bageraga aho Gafuni yabaga ndetse kenshi ni nabo babaga bafashe izo nzirakarengane, bose bivugwa ko bicirwaga hariya kandi akaba ari naho bashingurwa”. Hari n’izindi nzirakaregane zagiriwe nabi, abandi baracecekeshwa kubera bakeka ko bazi ibyakoze. Imibiri yose itaraboneka, bikekwako bayihinga hejuru abandi bayubatse hejuru. Byaba ari ubushinyaguzi!
Iyi nkuru twayiteguye kera, tuyibatangarije ku munsi nk’uyu w’umurimo dushishikariza abantu gukora. Abantu batunge ibyo baruhiye kuko ibyabaye byoosee, ahanini bishingiye ku rwango rukomoka ku mateka mabi abanyarwanda babayemo; Inda nini n’ubusambo. Bibiliya ibivuga neza ko: Umujura “Brigand”, atazanwa n’ikindi uretse kwiba; Kwica no Kurimbura… (Yohana 10:10). Mu nkuru yacu y’ubutaha tuzabagezaho inkuru irambuye ku mutwe uzwi ku izina ry’Aba Quinze, bo mu cyahoze ari Komini NKUMBA n’ukuntu baje guca umuvuno wo kuyoboka bakihisha mu nzego z’ibanze.
Twamagane abafite mu mitwe yabo umugambi mubisha wa NDUMUJURA; Twamagane abafite ingengabitekerezo ya Jenoside mu mitwe yabo, maze tuvuge ngo Jenoside ntigasubire ukundi. Twibuke Twiyubaka!
Karibumedia
