Urubyiruko rw’abakorerabushake (Youth Volunteers) mu gihugu by’umwiharuko urwo mu karere ka Musanze rwiyemeje kuba umusemburo w’impinduka, ruca uku biri n’ibiyobyabwenge, ibinyobwa bitujuje ubuziranenge n’ibizwi nk’ibyuma ahubwo rukaba “Sober Generation.”
Ibi babyiyemereje mu biganiro bagiranye n’inzego z’ibanze, iz’ubuyobozi bw’Akarere, ubw’umutekano n’imbere ya bagenzi babo ubwabo.
Ni igikorwa cyabimburiwe, kuri uyu wa 16 Ukwakira 2026, n’urugendo rw’ibirometero bitanu, rwitabiriwe n’abayobozi batandukanye, ingabo na Polisi, abahanzi n’abaturage muri rusange, rwatangiriye mu kagari ka Karwasa mu murenge wa Gacaca berekeza mu masanteri atandukanye ku muhanda Musanze_ Gahunga_ Rugarama_ Cyanika mu karere ka Burera.
Mu butumwa bwe, Umunyamabanga Nshingwabikorwa w’Umurenge wa Gacaca, Mukasano Gaudence, yasabye abari aho bose by’umwihariko urubyiruko kwirinda no kurwanya ibiyobyabwenge, ibinyobwa bitujuje ubuziranenge birimo n’ibyuma.
Yagize ati: “Turasaba urubyiruko kwirinda ibiyobyabwenge, kurwanya ababyinjiza mu gihugu, ababicuruza n’ababinywa bakabireka kuko byica ubuzima bikaba binahanwa n’amategeko.”
Uwatanze ubuhamya nk’uwakoresheje ibiyobyabwenge, Manishimwe Fidèle yagize ati: “Ibiyobyabwenge birimo n’ibyuma narabinyoye ariko byari bimaze kunzahaza none aho Leta ibihagarikiye, nkabivaho, maze kugarura agasura. Ni bibi birazahaza, bigomba kucibwa burundu.”
Uhagarariye urubyiruko rw’abakorerabushake mu ntara y’Amajyaruguru, Ndayisaba Peter, yavuze ko ubukorerabushake ari umurage w’abanyarwanda ko nk’urubyiruko rw’abakorerabushake batazihanganira ibiyobyabwenge n’ibindi byica urubyiruko.
Yagize ati: “Ubukorerabushake ni Umurage w’Abanyarwanda nk’uko urubyiruko rwafashe iya mbere mu kubohora igihugu, ari nayo mpamvu hateguye n’uyu munsi mu gihugu kugira ngo urubyiruko rwishimane n’abakibohoye mu kurwanya ibiyobyabwenge.”
Bwana NDAYISABA Peter, uhagarariye urubyiruko rw’abakorera_ bushake mu Ntara y’Amajyaruguru.
Yakomeje agira ati: “Uretse n’inzoga zitujuje ubuziranenge, n’izibwujuje, singombwa mu rubyiruko kuko nabyo byica ejo heza hazaza harwo. Tugomba rero gufatanyiriza hamwe, tugaragaza aho bikorerwa, aho babinywera ndetse n’aho bicururizwa.”
Umuyobozi wungirije w’Akarere ka Musanze, ushinzwe imibereho myiza, Kayiranga Théobald, yasabye urubyiruko kwirinda ibiyobyabwenge no kugira uruhare mu iterambere ry’igihugu.
Yagize ati: “Ukwezi k’Ubukorerabushake kwateguwe neza ari nayo mpamvu mu gihugu cyose hizihizwa uyu munsi w’ubukorerabushake, turwanya kandi twamagana ibiyobyabwenge kuko byica ubuzima bw’abantu. Bityo rero, ntawe twakwemerera kudusenya binyuze mu biyobyabwenge kuko ubuzima bw’igihugu cyacu buri mu biganza byacu.”
Bwana KAYIRANGA Théobald, V/ Mayor Ushinzwe Imibereho myiza y’Abaturage.
Urubyiruko rw’abakorerabushake (Youth Volunteers) rwo mu karere ka Musanze rwiyemeje ko rugiye kubakira abatishoboye ubwiherero 162, inzu 32 no kurwanya ibiyobyabwenge mu kwezi kumwe.
Ku bijyanye n’ibindi bikorwa biteganyijwe, Umuhuzabikorwa wa Youth Volunteers mu Karere ka Musanze, Robert Byiringiro, yatangaje ko bamaze kwakira abanyamuryango ibihumbi 80.000, avuga ko uku kwezi kwabahariwe bari kubakira abatishoboye inzu 32, ubwiherero 162 no gutunganya uturima tw’igikoni 362 hagamijwe kurwanya imirire mibi, kurwanya ibiyobyabwenge n’inzoga zitujuje ubuziranenge, ndetse no gushishikariza abana gusubira mu ishuri.
Bwana Robert BYIRINGIRO, umuhuzabikorwa wa youth volonteers mu karere ka Musanze.
Yanditswe na SETORA Janvier
