Umupolisi mukuru yasinze maze yumva yabaye Perezida, ahita arekura abantu 13 bafite ibyaha bikomeye.
Abategetsi bo muri Zambia bavuga ko umupolisi mukuru wari wasinze yarekuye abantu 13 bacyekwaho ibyaha, bari bafungiye muri kasho kugira ngo bashobore kujya kwizihiza ubunani.
Umupolisi mukuru ukora iperereza ku byaha Titus Phiri yatawe muri yombi nyuma yo kurekura abo bakekwa, bari bafungiye kuri stasiyo ya polisi ya Leonard Cheelo iri mu murwa mukuru Lusaka n’uko na we agahunga.
Abo bantu 13 bari bafunze bashinjwa ibyaha birimo: Gukubita; Ubujura no kwinjira mu nzu y’undi mu buryo bunyuranyije n’amategeko, hagamijwe gukora icyaha.
Ubu bose barimo kwihishahisha ndetse hatangiye igikorwa cyo kubahiga.
Umuvugizi wa polisi Rae Hamoonga yavuze ko Phiri “wari wasinze, yatse ku ngufu imfunguzo za kasho” umupolisi wo ku rwego rwo hasi Serah Banda ku bunani.
Yagize ati: “Nyuma yaho, umupolisi mukuru Phiri yafunguye kasho ifungiyemo abagabo na kasho ifungiyemo abagore n’uko ategeka abacyekwaho ibyaha kugenda, avuga ko bafite ubwisanzure bwo kwinjira mu mwaka mushya”.
“Mu bacyekwa 15 bari bari muri kasho, 13 baratorotse. Nyuma y’ibyo, uwo mupolisi mukuru yarahunze ava aho hantu”, yaje gutabwa muri yombi.
Phiri nta cyo aratangaza kuri ibyo birego: Avuga kuri ibi byabaye, Dickson Jere wahoze ari umuvugizi wa perezida akaba ari n’umunyamategeko, yanditse k’urubuga nkoranyambaga rwa Facebook ati:
“Nkomeza guseka iyo ntekereje ukuntu byari bimeze. Ni urwenya! Ariko na none, nibutse ko ibintu nk’ibi byabayeho mu mwaka wa 1997”.
Icyo gihe bucya ari ku bunani mu mwaka wa 1997, uwari umucamanza m’Urukiko Rukuru Kabazo Chanda, wapfuye wari uzwiho guteza impaka yategetse ko abantu 53 bakekwaho ibyaha bafungurwa, bamwe muri bo polisi yavugaga ko bateje akaga. Chanda yari arakajwe no kuba abo bakekwaho ibyaha bari baratawe muri yombi mu mwaka wa 1992 ariko bakaba bari bagejeje icyo gihe bataraburanishwa.
Chanda yasubiyemo ihame ryo mu rwego rw’amategeko ati: “Ubutabera butinze, ni ubutabera budatanzwe”.
Yanditswe na NKURUNZIZA Bonaventure.
