MUSAMZE: Birangiye Urukiko rw’Ibanze rwa Muhoza rufunze by’agateganyo Bishop Mugisha Mugiraneza Samuel.
Kuri uyu wa gatanu, tariki ya 14/02/2025 urukiko rw’ibanze rwa Muhoza ku isaha ya saa tatu za mu gitondo rufashe icyemezo cyo gufunga Bishop MUGISHA Mugiraneza Samuel ngo kubera impamvu zikomeye zagaragajwe n’ubushinjacyaha.
Ni urubanza ku ifunga n’ifungura rwaranzwe n’udukoryo twinshi kuko ku ikubitiro rwaburanishijwe kuya 06/02/2025 ubwo ubushinjacyaha bwasabaga urukiko ko Bishop MUGISHA Mugiraneza Samuel yaba afunzwe by’agateganyo iminsi mirongo itatu (30 jours) mu igororero rya Musanze mu gihe uyu Bishop MUGISHA Mugiraneza Samuel yasabaga urukiko ko rwamufungura by’agateganyo, agakurikiranwa ari hanze.
Ubwo hari hategerejwe ko urubanza ruzasomwa kuwa 11/02/2025, ntirwasomwe kuko umucamanza wari waruburanishije yarwikuyemo noneho rukimurirwa kuya 12/02/2025 ndetse n’Inteko y’iburanisha igahinduka.
Ubwo rwaburanishwaga ku nshuro ya kabiri, habanje kubaho kutumvikana hagati y’abanyamakuru n’inzego z’umutekano kubera ko zitifuzaga ko abanyamakuru bafata amafoto ariko birangira babonye ubwo burenganzira nk’uko biteganywa n’ingingo ya 136 y’itegeko n°27/2019 ryo kuwa 19/09/2019 ryerekeye imiburanishirize y’imanza z’inshinjabyaha.
Na none urubanza rugitangira, umwunganizi mu by’amategeko wa Bishop MUGISHA witwa Uwizeyimana Jean Claude yasabye urukiko ko iburanisha ryakomeza aruko ubugenzacyaha butegetswe gushyira ibimenyetso muri Sisitemu kandi nabo bakayigiraho uburenganzira (Access).
Ni nako byarakozwe maze urubanza rurasubikwa mu gihe cy’amasaha abiri gusa rurasubukurwa kuko ku isaha ya saa munani zuzuye rwaraburanushijwe, rupfundikirwa inteko iburanisha imenyeheje ababuranyi ko ruzasomwa kuri uyu wa gatanu tariki ya 14/02/2025 saa tatu za mu gitondo (9h00).
Bityo, kuri uyu wa gatanu tariki ya 14/02/2025 saa tatu (9h00) za mu gitondo. Urukiko rwasomye urubanza aho rwafashe icyemezo cy’uko Bishop MUGISHA Mugiraneza Samuel agomba gufungwa by’agateganyo iminsi mirongo itatu (30) mu igororero rya Musanze mu gihe iperereza rigikomeje.
Icyo cyemezo kiragira kiti: « Nk’uko biteganywa n’Itegeko n° 054/2018 ryo ku wa 13/08/2018, ryerekeye kurwanya Ruswa, Rushingiye ku mpamvu zikomeye zatanzwe n’ubushinjacyaha zirimo imvugo z’abatangabuhamya barimo Rev. Kubwayo Mukubano Charles na Rev.Kabaragasa Jean Baptiste;
Urukiko rumaze gusesengura izo mvugo zabo ruzihuza n’amategeko ndetse n’imyiregurire ya Bishop MUGISHA Mugiraneza Samuel rubisuzumye rusanga ibyo Bishop MUGISHA asaba atabyemererwa, bityo rutegeka ko aba afunzwe by’agateganyo iminsi mirongo itatu (30) mu igororero rya Musanze mu gihe iperereza rigikomeje. Ni uko rukijijwe kandi rusomewe mu ruhame none ku wa 14/02/2025 saa tatu za mu gitondo(9h00) ».
Urukiko rwibukije ababuranyi ko kujurira ari iminsi itanu (5jours).
Yanditswe na SETORA Janvier.
