Ikipe y’igihugu y’u Rwanda “Amavubi” y’abatarengeje imyaka 20 yatangiye imikino ya CECAFA itsindwa na Sudani igitego 1-0, ni igitego cyatsinzwe na kapiteni wa Sudan Monser Abdo Khmies Tiya, mu mukino wabereye kuri AZAM COMPLEX ku mugoroba washize.
Mu gihe ikipe y’igihugu Amavubi ikomeje imyitozo yitegura imikino izakinamo na Benin kuva kuri uyu wa Gatanu, umunyezamu w’Ikipe y’Igihugu ‘Amavubi’, Ntwali Fiacre, yagaragaje ko abakinnyi biteguye kwitwara neza bakabona itike ibajyana mu Gikombe cya Afurika ndetse bakagarura Perezida Kagame ku kibuga nk’ibanga ry’intsinzi yabo.
Ikipe ya Police FC yanze umukino wa gicuti wari kuyihuza na Rayon Sports FC kuwa Gatandatu, uyu mukino wahise usimburwa n’uwa AS Kigali uzaba kuri uyu wa Gatandatu kuri Kigali Pele Stadium.
Amakipe akomeje imyitozo yitegura imikino ya shampiyona izagaruka mu byumweru hafi bibiri, ari nako ategura imikino ya gishuti, uyu munsi Gorila FC irakina na Vision FC saa 9h00 ku Mumena Stadium. Naho Police FC irakina na Interforce FC saa 10h00 kuri Kigali Pele Stadium.
Umunya- America Antino Jackson wakiniraga REG BBC yerekeje muri APR BBC. Ikipe ya APR BBC ikomeje kwitegura kuzakina imikino ya BAL 2025. Uyu munya- America ashobora kuzakinira u Rwanda nk’umukinnyi wa rwo.
I Burayi
Mu nama yaberaga INEOS I London, amasaha agera muri arindwi yarangiye nta cyemezo gifashwe ku hazaza h’umutoza wa Man United Eric Ten Hag, benshi bari biteze ko uyu mutoza aza kwirukanwa ariko ntabyatangajwe, kuko yari inama isanzwe yigaga ku bindi bibazo biri muri iyi kipe.
Umwongereza Cole Palmer yabaye umukinnyi mwiza wahize abandi mw’ikipe y’igihugu y’abongereza mu mwaka wa 2023-2024, Palmer yagize uruhare mu bitego bigera kuri 44 ari mu ikipe ya Chelsea.
Umunya Ghana Antoine Semenyo ukinira ikipe ya Bournemouth ari kwifuzwa cyane na Liverpool, Newcastle United na Tottenham.
Ikipe ya Al-Nassr iri kwifuza umubiligi Kevin de Bruyne ukinira ikipe ya Man City ko yazayerekezamo nyuma y’iyi season ubwo amasezerano ye azaba arangiye.
Umwongereza Trent Alexander-Arnold ukinira Liverpool,ashobora kwerekeza muri Real Madrid agasangayo mwene wabo Jude Bellingham, ni nyuma y’uko Dani Carvajal avunitse mu gihe cyingana n’umwaka wose.
NKURUNZIZA Bonaventure.