BURUNDI: Perezida Ndayishimiye yatangaje ko yabonye Imana mu zuba.

Perezida Evariste Ndayishimiye w’u Burundi yatangaje ko yabonye Imana n’amaso ye ubwo yari mu giterane gisoza umwaka cyabaye tariki ya 31 Ukuboza 2024.

Iki giterane cyitabiriwe n’umugore we, Angeline Ndayubaha n’abandi bayobozi mu nzego zitandukanye z’igihugu: Abadipolomate ndetse n’abanyamadini n’abanyamatorero, bashimira Imana yabarinze mu 2024.

Perezida Ndayishimiye yashimiye abifatanyije n’umuryango we muri iki giterane, ashimira Imana ko yiyerekanye mu rugori rukikije izuba hejuru y’aho bari bateraniye.

Yagize ati: «Mu izina ry’umuryango wanjye, ngira ngo nongere gushimira abafatanyije natwe mu giterane cyo gushimira Imana twaraye dusoje ; Nishimiye ko n’Imana yiyerekanye mu rugori rukikije Izuba hejuru y’ahabereye igiterane, ku munsi wo gusoza”.

Uyu mukuru w’Igihugu yashyize ku mbuga nkoranyambaga ifoto yafashwe ubwo bari mu giterane, igaragaza izuba rizengurutswe n’uruziga, iruhande hari igicu kiremereye.

Yanditswe na Bonaventure NKURUNZIZA.